Qazaqstanda sporttan akademııalyq jattyǵý ortalyǵy ashylady

NUR-SULTAN. QazAqparat – Elimizde jańa akademııalyq oqý-jattyǵý ortalyǵy paıdalanýǵa beriledi. Bul týraly QR Mádenıet jáne sport mınıstrligi sport jáne dene shynyqtyrý isteri komıtetiniń tóraǵasy Samat Erǵalıev málim etti, dep habarlaıdy QazAqparat tilshisi.

«Elimizde sporttyq daıyndyqtyń qoldanystaǵy tájirıbesi kórsetip otyrǵandaı, sport mektep-ınternattary men kolledjderiniń túlekteri respýblıkalyq jáne halyqaralyq jarystarda jeńimpaz atanyp, memleket tarapynan jan-jaqty qoldaý kórip júr. Al, júldeli oryn almaǵan keıbir daryndy sportshylar sporttaǵy mansabyn aıaqtaýǵa májbúr. Osy jaǵdaıdy eskere otyryp akademııalyq jattyǵý ortalyǵyn ashýdy jón dep sanadyq. Joǵaryda atalǵan daryndy sportshylar osy akademııanyń bazasynda ózderiniń sport jolyn jalǵastyrý múmkindigine ıe bolady», - dedi Samat Erǵalıev ortalyq kommýnıkatsııalar qyzmetinde ótken baspasóz máslıhatynda.

Mınıstrlik ókiliniń aıtýynsha, akademııada sportshylar jyl boıy turyp, jetekshi sport mamandarynyń qoldaýymen oqý-jattyǵýyn jalǵastyrady.

«Osylaısha olar shtattyq quramadaǵy sportshylarǵa básekeles bola alady. Aıta ketetin jaǵdaı, elimizdegi 17 óńirdiń 14-de sport mektep-ınternaty men kolledjder bar. Oǵan qosa respýblıka deńgeıinde 5 sport mektebi jumys istep tur, onyń úsheýi - Almaty qalasynda. Oqý-jattyǵý baǵdarlamalary birdeı bolǵandyqtan, zańnamalyq turǵydan bul fýnktsııalar qaıtalanady», - deıdi ol.

Buǵan deıin habarlaǵanymyzdaı, elimizde damýyna erekshe mán beriletin 15 sport túri anyqtaldy.