Qazaqstanda sportshylardyń Olımpıadadaǵy nátıjesine taldaý jasalady

NUR-SULTAN. QazAqparat – Tokıodaǵy Olımpıadada Qazaqstan sportshylarynyń nátıjesine tıisti memlekettik qurylymdar taldaý jasaıdy, dep habarlaıdy QazAqparat tilshisi.

«Aldaǵy aptalarda QR Ulttyq Olımpıada komıteti respýblıkalyq federatsııalarmen ári Mádenıet jáne sport mınıstrligimen birlese Olımpıadada ulttyq qurama komandalardyń nátıjesi men daıyndyǵyna qatysty taldaý jumysyn júrgizedi. 10 qyrkúıekke deıin sport federatsııalary Olımpıada oıyndaryna qatysý boıynsha tyńǵylyqty esepti usynady. Onda sportshylardyń sátti nemese nátıjesiz óner kórsetýi máselesine qatysty taldaý bolady. Qyrkúıektiń sońyna qaraı biz sońǵy qorytyndyny shyǵaramyz. Osydan keıin qatelikterdi túzetý men kelesi olımpıadalyq tsıklge daıyndyq jumystary bastalady», - dedi QR UOK Bas hatshysy Andreı Krıýkov Ortalyq kommýnıkatsııalar qyzmetinde.

Onyń paıymynsha, Tokıoǵa jaqsy komanda bardy.

«Nátıjege qaramastan, bizdiń sportshylardyń árqaısysymen maqtan tutamyz. Olar pandamııa jaǵdaıynda daıyndyqtyń qıyn kezeńin eńserdi. Olarǵa deıin eshkim de osyndaı ahýalǵa tap bolmady», - dedi Andreı Krıýkov.

Budan buryn habarlanǵandaı, bokstan QR quramasynyń memlekettik jattyqtyrýshysy Baqtııar Artaev Olımpıdadaǵy boksshylardyń ónerine baǵa berdi.

Osy oraıda ol sportshylarda óte nashar kórsetkish bolǵanyn aıtty.