Qazaqstanda sport salasyn damytatyn biryńǵaı operator qurylmaq

NUR-SULTAN. QazAqparat - Qazaqstanda dene shynyqtyrý jáne sport salasynda demeýshilik kómek kórsetý boıynsha saıasatty júzege asyratyn biryńǵaı operator qurý josparlanýda. Bul týraly Parlament Senatyndaǵy Úkimet saǵatynda QR Mádenıet jáne sport vıtse-mınıstri Eldos Ramazanov málim etti, dep habarlaıdy QazAqparat tilshisi.

«Zań jobasyndaǵy mańyzdy jańashyldyq biryńǵaı operatordy qurýǵa qatysty. Bul óz kezeginde dene shynyqtyrý men sport salasynda demeýshilik kómek kórsetý boıynsha saıasatty iske asyrady. Sonymen qatar, zań jobasy aıasynda Ulttyq paralımpıadalyq komıtetine memlekettik tapsyrysqa qatysý quqyǵyn berý usynylǵan», - dedi Eldos Ramazanov.

Munymen qosa, zań jobasy «Ulttyq sýrdlımpıadalyq qozǵalys» atty jańa bappen tolyqtyrylǵan. Osy arqyly Ulttyq sýrdlımpıadalyq komıtet mártebesi men ókilettigin kúsheıtý eskerilip otyr.

«Onyń negizgi maqsaty - sýrdlımpıadalyq sport túrleri boıynsha múmkindigi shekteýli sportshylar arasynda dene shynyqtyrý men sportty damytýǵa járdemdesý. Atalǵan zań jobasyn qabyldaý buqaralyq sportty ary qaraı damytýǵa zańdy negiz qurýǵa múmkindik beredi, sondaı-aq dene shynyqtyrý jáne sportpen aınalysatyn el turǵyndaryn qamtýdy jetildiredi», - dedi E. Ramazanov.