Qazaqstanda sottalyp shyqqandar úshin tıptik jol kartasy iske qosyldy

ASTANA. QazAqparat - Qazaqstanda sottalyp shyqqandar úshin tıptik jol kartasy iske qosyldy. Bul týraly búgin Astanada «Túrme reformasynyń» ІIІ forýmynda QR Bas prokýrorynyń orynbasary Jaqyp Asanov málim etti. Eske sala keteıik, «Sen qoǵamǵa kereksiń!» atty jobanyń bastaýyna aınalatyn bul forým buryn sottalǵan adamdardy zańǵa baǵynýshy azamattar retinde qoǵamǵa reıntegratsııalaýǵa baǵyttalǵan.

Bas prokýratýra ókiliniń aıtýyna qaraǵanda, túrmeden bosap shyqqandardyń qaıta qylmysqa uryný qaýpi bostandyqtaǵy alǵashqy kúnderi óte joǵary bolyp tabylady.

«Sondyqtan da, olarǵa qatysty «Qaqpadan kútip alý» jobasyn júzege asyryp, beıimdeý ortalyqtaryna olardy ornalastyrǵan durys. Bul rette sottalyp shyqqandar turǵylyqty meken jaıy joq tulǵalarǵa arnalǵan beıimdeý ortalyqtaryna baryp ornalasa alady. Ondaı ortalyqtar respýblıkamyzdyń 22 qalasynda bar, alaıda túrmeden shyqqandar ol jerlerge bara bermeıdi. Osy úshin biz olarǵa arnap tıptik jol kartasyn ázirlegenbiz. Bul karta oblystar boıynsha naqty málimetterdi qamtı otyryp, qaıda barý kerek, qaıda túnese bolady, qujattardy qaıtyp qalpyna keltirý kerek, jumysty qaıdan tabýǵa bolady, memleketten qandaı qyzmetter alýǵa bolady degen saýaldarǵa jaýap ala alady. Buǵan qosa, olarǵa ózderiniń aldaǵy ómirlerin josparlaý, alǵa qoıǵan maqsattaryna qol jetkizý boıynsha keńester de beriledi», - deıdi J. Asanov.

Budan bólek, Bas prokýror orynbasary sottalyp shyqqandar úshin áleýmettendirýdiń zamanaýı qurylymyn qurý qajettigin alǵa tartady. Onyń aıtýynsha, KSRO kezinde «ótpeli baspanalar» bolǵan. Bundaı úılerdi Ulybrıtanııada «úıge barar joldaǵy úıler» dep te ataǵan.

«Ondaı nysandar qurýǵa qazynadan qarajattyń qajettiligi de shamaly. Máselen, búgin qańyrap turǵan qonys-kolonııalar bar, túrmede otyrǵandardyń bosap shyǵýyna 6-12 aı qalǵanda soǵan aýystyrý kerek. Osy arqyly olar bostandyqqa shyqqansha qoǵamǵa beıimdele beretin edi», - dedi ol.