Qazaqstanda sottalǵandardy baqylaý úshin 2,5 myń elektrondy bilezik jalǵa alyndy

NUR-SULTAN. QazAqparat – QR Іshki ister mınıstrligi Qylmystyq-atqarý júıesi komıteti sottalǵandardy baqylaý úshin 2,5 myń elektrondy bilezikti jalǵa aldy, dep habarlaıdy QazAqparat.

Qylmystyq-atqarý júıesi komıtetiniń basshysy Janat Eshmaǵambetovtiń aıtýynsha, elektrondyq baqylaý quraldary bolashaqta bas bostandyǵynan aıyrý oryndaryna qamaýdyń balamasy retinde qaralýy múmkin.

«Esepke alynǵan adamdardy elektrondyq baqylaý Batys Eýropa men AQSh-tyń kóptegen damyǵan elderinde, sonymen qatar TMD elderinde de qoldanylady. Halyqaralyq tájirıbeni zerttep, birneshe túrdi qoldana otyryp, biz elektrondy bilezikterdi tańdadyq. Kóptegen elderde elektrondy baqylaý quraldary túrmege qamaýǵa alýdyń ornyna qoldanylady. Al bizdiń jaǵdaıda bilezikter probatsııalyq baqylaýdaǵy sottalǵandarǵa qoldanylatyn bolady. Bolashaqta elektrondy bilezikterdi qoldaný bas bostandyǵynan aıyrýdyń balamasy retinde qarastyrylady dep oılaımyn», - dep atap ótti Janat Eshmaǵambetov.

Jalpy, respýblıkanyń barlyq óńirleri úshin 2,5 myń bilezik satyp alyndy. Olardyń basym bóligi Shyǵys Qazaqstan, Qaraǵandy jáne Qostanaı oblystary sııaqty iri óńirlerge berildi.

Bilezikter teriniń titirkenýin týdyrmaıdy, gıpoallergendi belbeýi bar. Ylǵalǵa tózimdi jáne onymen sý protsedýralaryn qabyldaýǵa bolady. Qurylǵy radıo sıgnalyn beredi jáne GSM/GPRS arnasy arqyly jumys isteıdi. Naqty ýaqyt rejıminde adamnyń qozǵalysyn baqylaýǵa múmkindik beredi.

«Ortasha alǵanda, bileziktiń bir jıyntyǵy 10 myń teńgege baǵalanyp otyr, olarǵa qyzmet kórsetý jáne tehnıkalyq súıemeldeý qosa kiredi», - dedi vedomstvodan.

Málim etilgendeı, elektrondy bilezikter kelesi sanattaǵy sottalǵandarǵa taǵylady: jazany óteý sharttaryn júıeli túrde buzatyn jáne birneshe eskertýleri bar adamdar, kámeletke tolmaǵandardyń jynystyq tıispeýshiligine qarsy qylmystary úshin sottalǵandar.

Bilezik taǵylǵan adamdardyń birqatar quqyǵy shekteledi. Birinshiden, baqylaýdaǵy adamnyń probatsııa qyzmetin jazbasha habardar etpesten turaqty turǵylyqty jerin aýystyrýǵa quqyǵy joq. Sonymen qatar onyń kez kelgen jerde erkin júrip-turýyna quqyǵy joq. Ekinshiden, birqatar tyıymdar belgilenedi: belgili bir jerlerge barý, belgili bir jerlerde belgilenbegen ýaqytta bolý jáne taǵy basqa.

Budan basqa, sottalǵandardy baqylaý úshin arnaıy baǵdarlama ornatylǵan planshetter (sottalǵandardyń jalpy sanynyń orta eseppen 95%) paıdalanylatyn bolady.