Qazaqstanda sot júıesiniń aqparattyq-kommýnıkatsııalyq tehnologııalary strategııasy qabyldanady
Sheteldik sýdıalardyń Qazaqstanǵa sapary aıasynda Ońtústik Qazaqstan oblystyq sotynyń ǵımaratynda Joǵarǵy Sot tóraǵasy Qaırat Mámımen kezdesý ótti. Áńgime basynda Q.Mámı K.Kamılovty Ózbekstan Respýblıkasy Joǵarǵy Sotynyń tóraǵasy laýazymyna taǵaıyndalýymen quttyqtady. «Bizdiń alǵashqy kezdesýimiz Shymkent qalasynda ótýde, bul biz úshin, kórshi jáne týysqandyq elder úshin óte mańyzdy», - dedi Q.Mámı.
Odan ári Ózbekstan taraby respýblıkadaǵy sot júıesiniń jumysymen jáne Elbasy bastamashylyq etken Ult Josparynyń sheńberindegi sot reformasynyń negizgi jetistikterimen tanystyryldy. Engizilgen jańashyldyqtardyń praktıkalyq nátıjelerine erekshe kóńil bólindi. Máselen, sot satylaryn ońtaılandyrý nátıjesinde sot daýlaryn qaraýdyń eń uzaq merzimi eki esege qysqartylǵan bolatyn. Búgingi tańda azamattyq isterdiń kópshiligi taraptardy sotqa shaqyrýynsyz, jeńildetilgen óndiris tártibimen qarastyrylady. Eldegi qylmystyq isterdiń tórtten bir bóligi 10 táýlik merzimge deıin jeńildetilgen protsedýra boıynsha qarastyrylady.
Sonymen qatar, Q.Mámı bitimgerlik protsedýralardy jáne medıatsııany engizýdiń qazaqstandyq tájirıbesine, Halyqaralyq Keńestiń qyzmetine toqtalyp ótti. Elektrondyq sot tóreligin júzege asyrýǵa erekshe kóńil bólindi. Sondaı-aq sottardyń bilim alýyna jáne respýblıkanyń Joǵarǵy Soty janyndaǵy Sot tóreligi akademııasynyń qyzmetine kóńil bólindi.
Kezdesý barysynda ózbekstandyq tarap sottardy reformalaý jáne elektrondyq tehnologııalardy engizý boıynsha Qazaqstanda atqarylǵan jumystarǵa qyzyǵýshylyq tanytty.
Kezdesý sońynda Qazaqstannyń Joǵarǵy Sot tóraǵasy ústimizdegi jyly Tashkent qalasynda ótetin ShYU-ǵa múshe elder Joǵarǵy sot tóraǵalarynyń kezekti Keńesiniń barysynda eki eldiń joǵarǵy sottary arasyndaǵy memorandýmǵa qol qoıý usynysyn bildirdi. Atalmysh qujat Qazaqstan men Ózbekstan sot organdary qarym-qatynasynyń basty baǵyttary men formalaryn belgileıdi.
Kezdesý aıaqtalǵannan keıin sheteldik delegatsııa Q.Mámıdiń tóraǵalyǵymen ótken óńirlerdiń beıne-konferentsııasyna qatysty. Onyń taqyryby «Elektrondyq sot tóreliginiń ózekti máseleleri». BKB sheńberinde Jambyl oblysyndaǵy «Elektrondyq qylmystyq is» pılottyq jobasyn ótkizý máselesi, Batys Qazaqstan oblysyndaǵy buıryqtyq óndiristegi isterdi elektrondyq túrde qarastyrý praktıkasy, sondaı-aq basqa da birqaratar pılottyq jobalar talqylandy. Sonymen qatar, engizýlerdi qorytyndylap, «Taldaý» forýmyn odan ári damytý boıynsha, aýdıobeınejazbalar júıesin qoldaný, onyń ishinde QR ІІM Qylmystyq-atqarý komıtetiniń uıymdarymen beınekonferentsııa baılanysyn qoldaný boıynsha tapsyrmalar berildi. «Tórelik» avtomattandyrylǵan aqparattyq-sarapatamalyq júıesin ári qaraı damytýǵa erekshe kóńil bólindi.
Shara aıasynda Joǵarǵy Sot tóraǵasy jaqyn arada 2018-2021 jyldarǵa arnalǵan Qazaqstan Respýblıkasy sot júıesiniń aqparattyq-kommýnıkatsııalyq tehnologııalarynyń strategııasy qabyldanatynyn atap ótti. Atalmysh strategııaǵa elektrondyq sot isin júrgizý boıynsha aldaǵy jobalar kiretin bolady.