Qazaqstanda sot saraptamasy óndirisi boıynsha pılottyq joba júzege asyrylýda

NUR-SULTAN. QazAqparat – Elimizde qylmystyq ister boıynsha jekelegen saraptama túrlerin básekeles ortaǵa berý jónindegi pılottyq joba iske asyrylyp jatyr. Bul týraly QR Ádilet mınıstri Marat Beketaev aıtty, dep habarlaıdy QazAqparat tilshisi.

«Jeke saraptama qyzmetin jáne básekege qabiletti saraptama ortasyn qalyptastyrý úshin jaǵdaı jasaý máselesi basty nazarda bolýdy jáne naqty sheshimderdi talap etedi. Joǵarǵy sotpen birlesip, Nur-Sultan jáne Almaty qalalarynyń Sot saraptamasy ınstıtýttarynda sottardyń bastapqy sot-qurylys, taýartaný jáne ekonomıkalyq saraptamalardy azamattyq ister boıynsha jeke sot sarapshylaryna taǵaıyndaý boıynsha pılottyq joba júzege asyryldy», - dedi mınıstr Ortalyq kommýnıkatsııalar qyzmetindegi baspasóz máslıhatynda.

Marat Beketaevtyń atap ótýinshe, Bas prokýratýra, Іshki ister mınıstrligimen birlesken buıryq aıasynda Nur-Cultan, Almaty, Shymkent qalalarynda, Qostanaı jáne Pavlodar oblystarynda qylmystyq ister boıynsha jekelegen saraptama túrlerin básekeles ortaǵa berý jónindegi pılottyq joba iske qosyldy.

«Pılottyq joba oń nátıje kórsetti. Atap aıtqanda, saraptamalar júrgizý merzimderi qysqartyldy jáne memlekettik sarapshylardyń júktemesi azaıtyldy. Osy baǵyttaǵy jumys saraptamalar túrleriniń sanyn jáne respýblıka óńirlerin ulǵaıtý jolymen jalǵastyrylatyn bolady», - dedi ol.