Qazaqstanda sot saraptamalarynyń bir bóligi aýtsorsıngke beriledi

NUR-SULTAN. QazAqparat – Qazaqstanda sot saraptamalaryn júrgizýdiń bir bóligi aýtsorsıng túrinde júrgiziledi. Bul týraly Ádilet mınıstri Marat Beketaev málim etti, dep habarlaıdy QazAqparat tilshisi.

Halyq aldynda esep berý barysynda Marat Beketaev sot-saraptama salasyndaǵy básekelestik ortany odan ári damytýǵa baǵyttalǵan qadamdardyń biri - sot saraptamalarynyń keıbir túrlerin jeke ortaǵa berý ekenin atap ótti.

Beketaev aýtsorsıng arqyly qylmystyq ister boıynsha ishki ister organdary taǵaıyndaǵan sot saraptamalarynyń keıbir túrlerin básekelestik ortaǵa berý týraly Ádilet mınıstrliginiń, Іshki ister mınıstrliginiń jáne Bas prokýratýranyń birlesken buıryǵyna qol qoıylǵanyn aıtty.

Sonymen, atalǵan buıryq boıynsha, Almaty, Shymkent qalalarynda jáne Pavlodar oblysynda pılottyq jumys iske qosyldy, sondaı-aq aǵymdaǵy jyldyń maýsym aıynyń sońyna deıin Nur-Sultan qalasynda iske qosylady.

Sonymen birge, aýtsorsıng arqyly saraptamanyń kelesi túrleri beriledi: sot-saraptamalyq avtotaýartaný zertteýi, sot qurylys saraptamasy, sot trasologııalyq saraptamasy, psıhologııalyq jáne sot-medıtsınalyq saraptamasy, sot psıhologııalyq-fılologııalyq saraptamasy, jol-kólik oqıǵasy jaǵdaılary men kólik quraldarynyń sot saraptamasy, kompıýterlik tehnologııa quraldaryn sot-saraptamalyq zertteý jáne tiri adamdarǵa sot-medıtsınalyq saraptama júrgizý.

Qazirgi ýaqytta Shymkent jáne Pavlodar oblysynda pılottyq jumys aıasynda jeke sot sarapshylarymen qylmystyq ister boıynsha 164 túrli sot-saraptamalyq zertteýler júrgizilgenin aıtqan jón (osy jyldyń mamyr jáne 17 maýsymǵa deıingi aralyqtaǵy málimetterge sáıkes).

Jalpy, atalǵan joba kelesi jaǵdaılarǵa yqpal etetini kútilýde:

- saraptama taǵaıyndaý ýaqytyn qysqartý, ásirese qamaýda otyrǵan adamdardyń qylmystyq isteri boıynsha;

- memlekettik sarapshylardyń júktemesin azaıtý;

- jeke sot saraptamasy ınstıtýtyn damytý;

- memlekettik bıýdjet shyǵyndaryn qysqartý.

Eske túsirsek, 2018 jyldyń qarasha aıynan bastap Ádilet mınıstrligi Joǵarǵy sotpen birlesip, sottardyń Nur-Sultan jáne Almaty qalalary boıynsha sot-saraptama ınstıtýttarynda jeke sot sarapshylaryna alǵashqy sot qurylys saraptamasy, sot taýartaný saraptamasy jáne sot ekonomıkalyq saraptamasy boıynsha saraptamalar taǵaıyndaý pılottyq jobasy júzege asyryldy. Tájirıbe óziniń oń nátıjesin berdi.

Aıta keteıik, jyl basynda sot saraptamasy isteriniń bir bóligin aýtsorsıngke berý josparlanyp otyrǵandyǵy habarlanǵan edi.