Qazaqstanda sot oryndaýshylar alımentterdi birinshi kezekte óndirip alatyn bolady

NUR-SULTAN. QazAqparat - Buryn keıbir jeke sot oryndaýshylar májbúrlep oryndatý merzimin sozatyn jaǵdaılar bolatyn. Endi olar alıment máselesimen birinshi kezekte aınalysady, dep habarlaıdy QazAqparat QR Ádilet mınıstrliginiń baspasóz qyzmetine silteme jasap.

Osy jyldyń 27 maýsymynda Qazaqstan Prezıdenti «Qazaqstan Respýblıkasynyń keıbir zańnamalyq aktilerine atqarýshylyq is júrgizýdi jáne qylmystyq zańnamany jetildirý máseleleri boıynsha ózgerister men tolyqtyrýlar engizý týraly» Zańǵa qol qoıdy.

Zańda atqarýshylyq is júrgizýdiń sapasyn jaqsartý jolymen azamattardyń quqyqtaryn qorǵaý men ýaqytyly iske asyrýdy, atap aıtqanda áleýmettik mańyzy bar ister sanattary boıynsha qamtamasyz etýge, asa nazar aýdarylady.

«Qabyldanǵan túzetýlermen jeke sot oryndaýshylarynyń alımentterdi, jalaqyny, zeınetaqyny, járdemaqylardy óndirip alý týraly, azamattardyń ómiri men densaýlyǵyna keltirilgen zııandy óteý týraly atqarýshylyq qujattardy oryndaýdyń basymdyǵy bekitildi», - dep habarlaıdy mınıstrlikten.

Buryn keıbir jeke sot oryndaýshylar, olardy asa qyzyqtyrmaǵandyqtan májbúrlep oryndatý sharalaryn qoldaný merzimin sozatyn jaǵdaılar bolatyn. Endigide, sot oryndaýshysy bir aı ishinde májbúrlep oryndatý sharalaryn qabyldamasa lıtsenzııasynan aıyrylýy múmkin.

Budan basqa memlekettik eńbek ınspektorynyń jalaqyny tóleý týraly uıǵarymyna atqarýshylyq qujat mártebesi beriledi.

Bul shara quqyqtaryn jumys berýshi buzǵan azamattarǵa jalaqyny óndirip alý máselelerin tez sheshýge, sotqa jumsalatyn ýaqyty men sot shyǵyndaryn únemdeýge múmkindik beredi.

Zań 2020 jylǵy 8 shildede, alǵash resmı jarııalanǵan kúnnen keıin kúntizbelik on kún ótken soń kúshine endi.