Qazaqstanda sorany medıtsınalyq maqsatta ósirýge bolady - ІІM

ASTANA. QazAqparat - Arnaıy ǵylymı ortalyq medıtsınalyq maqsatta jabaıy sora ósimdigin qoldaný múmkindigin zertteıdi. Bul týraly Astanada UQShU elderiniń zańsyz esirtki aınalymyna qarsy kúres organdarynyń úılestirýshi keńesiniń 18-otyrysynda ІІM esirtki bıznesine jáne esirtki aınalymyna qarsy kúres departamentiniń basshysy Sultan Kúsetov málim etti.

Onyń  aıtýynsha, xalyqaralyq konventsııa boıynsha, jabaıy sorany tek medıtsınalyq maqsatta paıdalaný úshin ósirýge bolady.

"Sebebi basqa maqsatta paıdalanǵannyń ózinde, tetragıdrokannabınol báribir qalady. Mysaly, sora ósimdiginen kóılek tigilse, onyń quramynda báribir esirtki qalady. Demek, kıimniń ózi esirtki paıdalanýshy úshin esirtkiniń kózi bolyp qala bermek. Sondyqtan sorany tek medıtsınalyq maqsatta ǵana paıdalaný týraly sheshim jasaldy", - deıdi ol.

Osy sebepten, onyń sózi boıynsha, qazirgi ýaqytta sorany medıtsınalyq dári-dármekter shyǵarýǵa paıdalaný máselesi qaralyp jatyr.

"Ózderińiz bilesizder, bıyl otyrys ótip, onda Darıǵa Nazarbaevanyń tapsyrmasy boıynsha, aktsıonerlik qoǵamǵa soradan medıtsınalyq dárilik zattardy shyǵarý týraly máseleni zertteýge tapsyrma berildi. Biz qazir kvota suradyq, olar ǵylymı izdenister jasaıdy. Ǵylymı zertteýler jasalǵannan soń, jabaıy soradan dári-dármek jasaı alamyz ba, joq pa - osy saýal anyqtalady", - dep atap ótti Kúsetov.