Qazaqstanda sońǵy úsh jylda kásipkerlik qyzmetke zańsyz aralasýdyń 976 faktisi anyqtalǵan
«Atameken» UKP V Sezine oraılastyrylǵan bıznes-aptalyq aıasynda ótkizilgen forýmda «Atameken» UKP men Memlekettik qyzmet isteri jáne sybaılas jemqorlyqqa qarsy is-qımyl agenttiginiń birlesken jumysy talqylandy.
Talqylaý barysynda ekijaqty birlesken jumystyń nátıjesi, elimizde bıznes-ahýaldy jaqsartýǵa múmkindik bergeni aıtyldy.
«Tek 2017 jyly birlesken jumystyń arqasynda bıznes úshin asa mańyzdy 16 salada jemqorlyq táýekelderi boıynsha mańyzdy taldaý júrgizilip, 800-den astam usynys ázirlendi. Onyń oryndalýy eki kodeks, alty zań jáne basqa da normatıvti-quqyqtyq aktilerde kórinis tapty. Bul kásipkerlikke qysym kórsetýdi azaıtýǵa múmkindik berdi», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov.
Agenttiktiń aqparatynsha, sońǵy úsh jylda kásipkerlik qyzmetke zańsyz aralasýynyń 976 faktisi anyqtalyp, bul áreketi úshin 389 laýazymdy tulǵa sottalǵan. Qolǵa alynǵan sharalardyń nátıjesinde 500-den astam kásipkerdiń quqyǵy qorǵalǵan.
Sonymen qatar, kásipkerlikti damytýda sybaılas jemqorlyq pen ákimshilik kedergiler problemalaryna da nazar aýdaryldy.
Qazirgi tańda kásipkerlik qyzmetti júrgizýdiń qolaıly sharttaryn qurý jáne ınvestorlar men kásipkerlerdiń memlekettik bılik organdaryna senimdiligin arttyrý maqsatynda agenttik Investıtsııalar jáne damý mınıstrligi jáne Syrtqy ister mınıstrligimen Protecting Business and Investments atty jobany iske asyrýdy bastady.