Qazaqstanda sońǵy úsh jylda 22,1 mlrd teńgege veterınarııalyq preparattar satyp alyndy
«Veterınarlyq ınspektsııanyń qyzmetin sapaly jańa deńgeıge kóterý kerek. Bir jaǵynan onyń epızootııalyq jaǵdaıǵa, zań talaptarynyń oryndalý jaǵdaıyna jaýapkershiligin arttyrý, ekinshi jaǵynan ony qajetti materıaldyq – tehnıkalyq resýrstarmen jáne arnaıy kólik quraldarymen jabdyqtaý qajet. Qazirgi ýaqytta Qazaqstanda 2010-2012 jyldary paıdalanýǵa berilgen quny 14,6 mlrd teńgeni quraıtyn 114 veterınarııalyq zerthanalr jumys isteıdi. Olardyń jumysyna erekshe nazar aýdaryp, múmkindikterin barynsha paıdalaný qajet», - dedi E. Barlybaev.
Onyń aıtýynsha, mal aýrýlarynyń aldyn alý, dıagnostıkalaý jáne emdeýdiń zamanaýı ádisterine belsendi túrde kóshý kerek. Soǵan sáıkes veterınarııa júıesin qajetti normatıvtik jáne materıaldyq-tehnıkalyq bazalarmen jabdyqtaý qajet. Sonymen qatar, otandyq veterınarııada qoldanylatyn vaktsınalar men preparattardyń sapasyn erekshe baqylaýǵa alǵan jón.
«Tek sońǵy 3 jyldyń ishinde Qazaqstan Respýblıkasy Reseı Federatsııasynan 7,8 mlrd teńgege aýsylǵa qarsy vaktsınalardyń 110,5 mln dozasyn satyp aldy, bul barlyq satyp alynǵan vaktsınalardyń 35% paıyzyn quraıdy. Іri qara maldyń nodýlıarlyq dermatıtine qarsy vaktsınanyń quny 2019 jylmen salystyrǵanda 43,5% paıyzǵa artyp, 9 mln doza 2,1 mlrd teńgeni qurady. Jalpy, sońǵy úsh jylda 22,1 mlrd teńgege veterınarııalyq preparattar satyp alyndy, onyń 44,7 paıyzy otandyq ónimge tıesili. Osyǵan baılanysty, otandyq veterınarııalyq preparattardyń sapasy men qoljetimdiligin arttyrý úshin qazaqstandyq veterınarııalyq preparattardy óndirýshilermen, onyń ishinde memlekettik tapsyrys arqyly uzaq merzimdi kelisimsharttar jasaýdy basym túrde júzege asyrý usynylady», - dedi depýtat.