Qazaqstanda sońǵy táýlikte koronavırýstan bir adam qaıtys boldy

ASTANA. QazAqparat - Ótken táýlikte Qazaqstanda COVID-19 vırýsynan bir adam qaıtys boldy. Bul týraly Densaýlyq saqtaý mınıstrligi málimdedi, dep habarlaıdy QazAqparat tilshisi.

Mınıstrlik taratqan málimetke sáıkes, naýqastyń jasy 83-te edi. Onyń qosymsha aýrýlary boldy.
«Ol ekpe almaǵan, qatar júretin aýrýlar – ókpeniń sozylmaly obstrýktıvti aýrýy (ÓSOA), arterııalyq gıpertenzııa bar edi», - dep habarlady Densaýlyq saqtaý mınıstrliginen.
Buǵan deıin Qazaqstanda ótken táýlikte koronavırýs ınfektsııasyn juqtyrýdyń 87 jaǵdaıy anyqtalǵany, taǵy eki adamnyń kovıd pnevmonııasyna shaldyqqany habarlanǵan bolatyn.
4 qańtardaǵy jaǵdaı boıynsha 2600 adam koronavırýstan em alýyn jalǵastyrýda, onyń ishinde 259 naýqas statsıonarda jatsa, 2341 naýqas ambýlatorlyq em qabyldap jatyr.
Sońǵy málimetterge sáıkes, KVI+ jáne KVI- jaǵdaılarynyń arasynda: aýyr jaǵdaıda – jeti naýqas, óte aýyr jaǵdaıda – alty naýqas, jasandy tynys alý apparatynda jatqan eki naýqas bar.
Buǵan deıin QR Densaýlyq saqtaý mınıstrligi qazaqstandyqtarǵa Qytaıǵa barýdan bas tartýdy keńes etken bolatyn.