Qazaqstanda sońǵy on jylda elýge tarta ken oryndary ashylǵan

ASTANA. QazAqparat - Qazaqstanda sońǵy on jylda elýge tarta ken oryndary ashyldy. Bul týraly búgin Ortalyq kommýnıkatsııalar qyzmetinde ótken brıfıng barysynda Energetıka birinshi vıtse-mınıstri Uzaqbaı Qarabalın málim etti. Brıfıng Elbasy aıqyndaǵan «100 qadam» Ult jospary aıasynda jer qoınaýyn paıdalaný salasyndaǵy ilgeri reformalar taqyrybynda ótken bolatyn.

«1996-2014 jyldar aralyǵynda elimizdegi geologııalyq barlaý jumystaryna jumsalǵan shyǵyndar árbir sharshy/shaqyrymǵa 3 dollardan kelgen bolatyn. Bul damyǵan elderge qaraǵanda aıtarlyqtaı tómen kórsetkish jáne biz az zerttelgen aýmaqtardyń sharshy/shaqyrymyna shamamen 0,2 dollar jumsappyz. Osylaısha, Qazaqstannyń aýmaǵynda geologııalyq zertteýler, barlaýlar óte az júrgizilgen bolyp otyr. Osynyń saldarynan elimizdiń az zerttelgen aýmaqtarynyń ınvestıtsııalyq tartymdylyǵy tómen bolyp tabylady. Al sońǵy on jylda geologııalyq barlaýda belgili bir ilgerileýshilik bolǵanyna qaramastan, elimizde iri ken oryndarynyń ashylmaý faktisi de osy ınvestıtsııalyq tartymdylyqtyń tómendigin ańǵartsa kerek. Máselen, sońǵy on jylda «A+B+S1» sanatynda 164 mln. tonna jáne «S2» sanatynda 169 mln. tonna qorlary bar 50-ge tarta ken oryndary ashyldy», - deıdi U. Qarabalın.

Onyń aıtýynsha, qazirgi tańda Qazaqstanda jańa aýqymdy ken oryndaryn ashý úshin geologııalyq barlaý jumystaryna ınvestıtsııalar tartý máselesi ózekti bolyp tabylady.