Qazaqstanda sońǵy 3 jylda tárkilengen sıntetıkalyq esirtkiler 6-dan 140 kg-ǵa deıin ulǵaıǵan

NUR-SULTAN. QazAqparat - Іshki ister mınıstri QR Prezıdenti janyndaǵy jastar saıasaty jónindegi keńestiń otyrysynda esirtki qylmysymen qalaı kúresýge bolatynyn aıtty, dep habarlaıdy QazAqparat polisia.kz saıtyna silteem jasap.

Memlekettik keńesshi Erlan Qarınniń kirispe sózinen keıin ІІM basshysy keńeske qatysýshylarǵa sıntetıkalyq esirtkiniń zańsyz aınalymy búginde tek Qazaqstanda ǵana emes, búkil álemde esirtki ahýalyna aıtarlyqtaı áser etkenin habarlady.

Qoljetimdiligi men arzandyǵyna baılanysty olar esirtkiniń dástúrli túrlerin (geroın, apıyn, kokaın) belsendi túrde yǵystyrýda. Tárkilengen «sıntetıka» kólemi sońǵy úsh jylda 6-dan 140 kg-ǵa deıin ulǵaıdy. Osy ýaqyt aralyǵynda polıtsııa 41 esirtki zerthanasyn joıdy, onyń 23-i – osy jyly.

Mınıstr Marat Ahmetjanov osy saladaǵy jazanyń qatańdatylǵanyn eske saldy.

Atap aıtqanda, ótken jyldyń qazan aıynan bastap «sıntetıka» esirtkiniń aýyr túrlerine teńestirildi jáne olardy saqtaǵany úshin qylmystyq jaýapkershilik bir gramnan (buryn – 50 gramnan) bastalady.

Mınıstrdiń pikirinshe, «dárihanalyq nashaqorlyq» qarqyndy túrde ósýde. Іshki ister mınıstrliginiń bastamasymen tramadol, tropıkamıd jáne azot oksıdi sııaqty preparattar kúshti zattardyń tizimine engizilgen, biraq olardyń zańsyz aınalymy úshin naqty jaýapkershilik, ókinishke oraı, joq.

Foto: polisia.kz