Qazaqstanda shyǵarylǵan 866 jasandy tynys alý apparaty óńirlerge jetkizildi

NUR-SULTAN. QazAqparat – Qazaqstandyq kompanııalar shyǵarǵan 866 jasandy tynys alý apparaty elimizdiń qalalaryna jetkizildi, dep habarlaıdy QazAqparat tilshisi QR Indýstrııa jáne ıfraqurylymdyq damý mınıstrliginiń baspasóz qyzmetine silteme jasap.

Baspasóz qyzmetiniń málimetterine qaraǵanda, búgingi tańda el óńirlerine 866 (58%) jasandy tynys alý apparaty jetkizildi. Sondaı-aq, 494 danasy (33 %) tıisti jerlerine jiberilip, 140 apparat (9 %) daıyn tur.

Apparattardyń barlyǵyn bıylǵy 15 qazanǵa deıin jetkizip, olardy iske qosý josparlanǵan.

Qazaqstanda memlekettiń qatysýymen «Qazaqstan Aselsan ınjınırıng» JShS (Nur-Sultan qalasy) jáne «Tynys» AQ (Kókshetaý qalasy) kásiporyndary jasandy tynys alý apparattaryn shyǵarady.

Bul kásiporyndar - «Qazaqstan ınjınırıng» ulttyq kompanııasynyń enshiles uıymdary.

Koronavırýs pandemııasyna baılanysty elde qalyptasqan epıdemıologııalyq jaǵdaıǵa oraı jasandy tynys alý apparattarynyń jetispeýshiligin eskerip, «Qazaqstan Aselsan ınjınırıng» JShS qysqa ýaqyt ishinde ókpeni jasandy jeldetetin statsıonarlyq apparattar óndirisin ıgerdi.

Al «Tynys» AQ «Kókshetaý-4P» ókpeni jeldetetin 680 mobıldi apparat shyǵaryp, medıtsınalyq mekemelerge jetkizdi.

Medıtsına mamandarynyń pikirinshe, bul apparattar qoldanýǵa yńǵaıly, senimdi jáne elektr qýatyna táýeldi emes.

Kásiporynnyń óndiristik qýaty aıyna 500 apparat shyǵarýǵa jetedi.

Odan bólek, «Tynys» AQ «Kókshetaý 3» jasandy tynys alý portatıvti apparattaryn, sondaı-aq medıtsınalyq buıymdardyń túrli nomenklatýrasyn, onyń ishinde kóp rettik betperdelerdi, múgedekterge arnalǵan arbalardy jáne t.b. shyǵarady.

«Bul kásiporyndardyń negizgi qyzmeti Qazaqstan Respýblıkasynyń jáne ózge de elderdiń Qarýly Kúshteriniń qajettilikteri úshin joǵary tehnologııalyq ónimder shyǵarýǵa baǵyttalǵan. Al jasandy tynys alý apparaty óndirisi medıtsınalyq mekemelerdiń qajettilikteri úshin memlekettik tapsyrys aıasynda jolǵa qoıyldy. Kásiporyndar qosymsha qajettilik týyndaǵan jaǵdaıda medıtsınalyq tehnıka men kez kelgen ónimdi qajet mólsherde óndirip, jetkize alady» - delingen habarlamada.