Qazaqstanda shyǵarylatyn qurylys materıaldary ishki suranysty tolyq qanaǵattandyra alady - Á.Isekeshev

ASTANA. 23 sáýir. QazAqparat -«Mınıstr Áset Isekeshevtiń tóraǵalyǵymen Indýstrııa jáne jańa tehnologııalar mınıstrliginde qurylys ındýstrııasyn damytý máseleleri boıynsha respýblıkalyq keńes ótti, dep habarlaıdy Indýstrııa jáne jańa tehnologııalar mınıstrliginiń baspasóz qyzmeti.

Keńestiń kún tártibi el Prezıdentiniń tapsyrmalary, sondaı-aq, memlekettik jáne salalyq baǵdarlamalyq qujattarda bekitilgen mindetter sheńberinde qurylys salasyn damytýdyń basty máseleleri negizinde qalyptastyryldy. Atap aıtqanda, «Qoljetimdi turǵyn úı 2020» baǵdarlamasyn ázirleý, qurylys ındýstrııasyn jáne qurylys materıaldaryn shyǵarýdy damytýdyń qoldanystaǵy baǵdarlamasyn jetildirý máseleleri talqylandy.

Áset Isekeshevtiń aıtýynsha «Qoljetimdi turǵyn úı 2020» baǵdarlamasyn ázirleý týraly Memleket basshysynyń tapsyrmalaryn oryndaý sheńberinde Indýstrııa jáne jańa tehnologııalar mınıstrligi  negizgi qurylys materıaldarynyń kólemderin eskere otyryp, qurylys materıaldaryndaǵy qajettilikke qaıta esepteý júrgizdi. Osyndaı esepter  negizgi jol-qurylys materıaldary boıynsha da júrgizildi. Olardyń negizinde qurylys salasyn qajetti materıaldarmen qamtamasyz etý jónindegi qosymsha sharalar pysyqtaldy.

Qazirgi ýaqytta, otandyq qurylys materıaldaryn óndirý kólemi  65,2 paıyzǵa jetti. Sonymen birge, Údemeli ındýstrııalandyrý baǵdarlamasymen ishki naryqtyń qurylys materıaldaryna degen  qajettilikterdi qanaǵattandyrý 80 paıyzǵa deıin jetedi dep  boljanýda. Memlekettik organdardyń, qurylys salýshylar qaýymdastyqtarynyń, «Atameken» Qazaqstannyń ulttyq ekonomıkalyq palatasynyń, damý ınstıtýttarynyń ókilderi qurylys materıaldaryn shyǵarý salasyndaǵy kókeıkesti problemalardy talqylady. Atap aıtqanda, jumys istep turǵan kásiporyndar qýattylyqtarynyń júktelimi, ónimdi ótkizý problemalary, óndiristik kúshterdi utymdy ornalastyrý jáne ındýstrııalyq qurylys kombınattarynyń jelisin damytý máseleleri sóz boldy.

Áset Isekeshev Qazaqstanda shyǵarylatyn qurylys materıaldary ishki suranysty tolyq qanaǵattandyra alady dep atap ótti. Atap aıtqanda, tsement, betonnan jasalǵan buıymdar, áktas, qabyrshaq, asbest, armatýra, gıpskarton, metall qubyrlary jáne qurylys materıaldarynyń túrleri boıynsha salanyń barlyq ishki qajettilikterin qamtamasyz etetindeı jumys istep turǵan qýattylyqtar jetkilikti. Alaıda, kásiporyndardyń tómen júktelimi ázirge ımporttan bas tartýǵa múmkindik bermeıdi.