Qazaqstanda ishki saýda salasyndaǵy bıznesti memlekettik qoldaýdyń jańa tetigi iske qosylady

<p>ASTANA. KAZINFORM - Joǵary aýdıtorlyq palatanyń nusqaýyn oryndaý sheńberinde Qazaqstanda ishki saýda sýbektilerin memlekettik qoldaýdyń jańa sharalary ázirlenip, bekitildi.</p>

QR Joǵary aýdıtorlyq palata baspasóz qyzmetiniń habarlaýynsha, bıyl Saýda jáne ıntegratsııa mınıstrliginiń jáne onyń vedomstvolyq baǵynysty uıymdarynyń qyzmetine memlekettik aýdıt júrgizildi. Aýdıt barysynda respýblıkada saýda ınfraqurylymynyń odan ári damýyn tejeıtin sebepterdiń biri bıznestiń osy baǵytta ınvestıtsııalaý múmkindikteriniń shekteýligi ekeni anyqtaldy. Osyǵan baılanysty saýda jáne ıntegratsııa mınıstrligine kásipkerlik sýbektileriniń qarjylyq áleýetin arttyrýdyń naqty mehanızmderin aıqyndaý tapsyryldy.

Nátıjesinde mınıstrdiń bıyl 21 maýsymdaǵy buıryǵymen Іshki saýda sýbektilerine jeke kásipkerlikti memlekettik qoldaý sharalaryn kórsetý qaǵıdalary bekitildi, olar qazirgi zamanǵy saýda ınfraqurylymyn qalyptastyrý boıynsha is-sharalardy yntalandyrýǵa baǵyttalǵan.

Birinshi kezeńde memleket bul baǵytqa 4 mlrd teńge bóldi.

«Damý» qorynan qarjylandyrýdy osy jyldyń qazan aıynda bastaý josparlanýda.

Sondaı-aq erejede memlekettik qoldaý alýshylar úshin otandyq óndiristiń azyq-túlik jáne azyq-túlik emes taýarlaryn saýda oryndaryna ornalastyrý boıynsha qarsy mindettemeler kózdelgen. Bul qazaqstandyq taýar óndirýshilerdiń ónimdi ótkizý arnalaryna qoljetimdiligin arttyrady.

Osyǵan deıin memlekettik aýdıtten keıin ulttyq parkterde abattandyrý jumystary bastalǵany habarlandy.