Qazaqstanda shıpajaıdaǵy demalys quny qansha turady

<p>ASTANA. KAZINFORM - Densaýlyǵyn jaqsartýdy oılaıtyn adamdar úshin kýrorttyq-saýyqtyrý demalysyn uıymdastyrý qashanda mańyzdy.&nbsp; Qazaqstandyq shıpajaılar emniń birneshe túrin usynady. Mıneraldy sý, balshyq, fızıoterapııa, klımattyq em, massaj da suranysqa ıe. Baǵa saýyqtyrý, emdeý oryndarynyń qaı óńirde ornalasqanyna baılanysty ózgerip otyrady. Kazinform agenttiginiń tilshisi Qazaqstandaǵy shıpajaılardyń qandaı em usynatynyn, oǵan qansha qarjy kerek ekenin anyqtap bildi.</p>

Elimizdi 115 shıpajaı bar. Onda 672 dáriger em júrgizedi. Byltyr 413 myń adam óz densaýlyǵyn nyǵaıtý úshin osy emdeý-saýyqtyrý oryndarynda tynyqty. Alaıda jyl ishinde qyzmet kórsetý quny 8,3% kóterilgen. Al jyl basynan beri taǵy 8% qymbattady.

«Jyl basynan beri baǵa ásirese Almaty oblysynda edáýir kóterildi. Munda qyzmet kórsetý quny 35,6% ósti. Al Batys Qazaqstan oblysynda 29,8%, Qostanaı oblysynda 25,2% kóterildi. Mańǵystaý oblysynda kerisinshe baǵa 1,5% tómendedi», - dep habarlady Ulttyq statıstıka bıýrosy.

Almaty oblysynda kóbine tynys alý joldary men tirek-qımyl júıesi, teri jáne júrek-qan tamyrlary aýrýlarynan emdeıdi. Em-dom kezinde balshyq jáne klımattyq em qoldanylady. 

Kllaj: Kazinform

Almatydaǵy taý kesheninde tórt mezgil tamaq beretin, dáriger keńesi men emi júrgiziletin standart nómirler bir adamǵa 21 000 teńge dep belgilengen. Al jartylaı lıýks qyzmeti 22 000 - 38 500 teńge aralyǵynda. Al lıýks qyzmeti 30 000 teńgeden bastalyp óse beredi. Sonymen birge ýaqytty tıimdi ári jaıly ótkizgisi keletin adamdar VIP nómirdi tańdap, táýligine 140 000 teńge tólese bolady.

Mańǵystaý oblysyndaǵy shıpajaı da em jáne saýyqtyrý qyzmetterin usynady. Munda júıke júıesi aýrýlary, tirek-qımyl, júrek-qan tamyrlary jáne asqazan júıesi aýrýlaryna em izdegender bara alady. Teńiz aýasy ásirese tynys alý joldary aýyratyn adamdarǵa taptyrmas em. Munda qarapaıym qyzmet bir adamǵa táýligine 18 350 teńge. Standart nómirler baǵasy 22 300 teńgeden bastalady. Al odan táýiri 25 350 teńgeden bastalady.

Shýche-Býrabaı kýrorttyq aımaǵynyń tabıǵaty erekshe kóz tartady. Taza aýa, ný orman, sý aıdyny adamnyń jan dúnıesine tynyshtyq syılaıdy. Munda astma, pnevmonııa sekildi tynys alý joldary aýrýyna shaldyqqan adamdar men júregi syr bergen naýqastar em izdep keledi. Tirek-qımyly, asqazan aýrýlarynyń asqynǵan túrin de osynda emdetedi. Shıpajaıda emmen qatar ftızıoterapııa, massaj, balshyq pen mıneraldy sý bar.

Standart nómirlerge bir adam qonystansa táýligine 22 000 teńgeden bastalady. Al jartylaı lıýks 23 000 teńge, lıýks 45 000 teńge bolyp tur. VIP-apartament quny 80 000 teńgeden bastalady.

Saryaǵashta jerasty ystyq sýy men mıneraldy sý bar. Bul tynys alý jáne býyn aýrýyna qoldanylady. Munda tirek-qımyl aýrýlary, júıke aýrýlary men gınekologııalyq dertke shıpa izdeıtin adamdar barady.

Standart nómirlerde tamaqtaný men em túrleri qarastyrylǵan. Bul qyzmettiń quny 20 000 teńgeden bastalady. Jartylaı lıýks 25 000, lıýks 36 000 teńgeden bastalady. VIP-apartament quny 50 000 - 120 000 teńge aralyǵynda.

Elimizdegi shıpajaılar emdeý-saýyqtyrý sharalaryna qazaqy emdi de qosqanyn jazǵan bolatynbyz.