Qazaqstanda sheteldik týrısterge arnalǵan QR kod iske qosyldy

<p>ASTANA. KAZINFORM &ndash; Elimizge saıahattap kelgen shetel azamattary QR kodtyń kómegimen gıd, taksı, sım-karta satyp alý taǵy sol sııaqty qyzmetke qol jetkize alady. Bul týraly Týrızm jáne sport mınıstri Ermek Marjyqpaev málim etti.</p>

«Týrızm salasyn tsıfrlandyrý boıynsha jan-jaqty jumys júrgizýde. Mysaly, sheteldik týrısterdiń jaılylyǵy úshin shekaradan ótkende QR-kod qyzmeti usynylady. Onyń kómegimen gıdter, taksı quny, sım-karta satyp alý jáne taǵy basqa aqparattardy taba alady. Sondaı-aq, gıdter men ekskýrsııa jetekshileriniń qyzmetin tsıfrlandyrý baǵytynda biryńǵaı aqparattar bazasyn qurý jumysy jalǵasyn tabady», - dedi Ermek Marjyqpaev vedomstvonyń keńeıtilgen alqa otyrysynda.

Odan bólek, mınıstrdiń málimdeýinshe, «Kazakhstantravel», «eQonaq» platformasynda onlaın izdeý jáne brondaý, suranystarǵa taldaý jasaý jáne Qazaqstan týrızmi salasyndaǵy vırtýaldy kómekshiniń fýnktsıonalyn biriktiretin jasandy ıntellekttiń ozyq tehnologııalaryna negizdelgen ınnovatsııalyq «Smart Trevel» ıntegratsııalanǵan platformasyn engizý isi pysyqtalyp jatyr.

«eQonaq platformasyn vızany rásimdeý protsesi úshin paıdalanýdy usynamyz, bul adamı faktordy joıady. Sonymen qatar qurlyqtaǵy ótkizý pýnktterinde elektrondyq vıza boıynsha memlekettik shekaradan ótýge ruqsat berý boıynsha jumys júrgizilip jatyr. Qazirgi ýaqytta E-vıza boıynsha elge tek Astana men Almaty halyqaralyq áýejaılary arqyly ǵana kirýge bolady», - dep tolyqtyrdy vedomstvo basshysy.