Qazaqstanda sheteldikter úshin týrıstik jarna engizilmek
«KAZAKH INVEST» kompanııasynyń málimetinshe, jyl basynan «Qazaqstan Respýblıkasyndaǵy týrıstik qyzmet týraly» QR Zańy kúshine endi. Oǵan sáıkes zańnamaǵa birqatar mańyzdy túzetýler ázirlendi. Atap aıtqanda,týrızm salasyndaǵy ınvestıtsııalyq jobalardy damytý bóliginde 2022 jylǵy 1 qańtardan bastap ınvestıtsııalyq basym kelisimshartqa qol qoıý jáne tıisti preferentsııalar alý úshin ınvestor jobany iske asyrýǵa keminde 200 myń AEK (612,6 mlnteńge) salýy tıis. Mysaly, jańa óndirister qurý kezinde barlyq jobalar úshin jalpy shek - 2 mln AEK (6,1 mlrd teńgeden astam), jumys istep turǵandaryn jańartý kezinde - 5 mln AEK (15,3 mlrd teńgeden astam), tamaq jáne jeńil ónerkásip salasynda jańa óndirister qurylǵan jaǵdaıda – 1 mln AEK (3 mlrd teńge) bolady.
Sonymen qatar osy jyldan bastap Kásipkerlik kodeksinde týrıstik qyzmet shaǵyn jáne orta kásipkerlikpen, ındýstrııalyq-ınnovatsııalyq qyzmetpen, ınvestıtsııalyq qyzmetpen jáne agroónerkásiptik sektormen qatar kásipkerlikti qoldaýdyń negizgi baǵyttaryna engizilgen.
«Osylaısha, bıznes árbir sheteldik týrıst úshin kelý týrızmi salasyndaǵy týroperatorlardyń shyǵyndaryn sýbsıdııalaý, týrıstik qyzmet obektilerin salý, rekonstrýktsııalaý, taý shańǵysy kýrorttary úshin jabdyqtar men tehnıkany satyp alý, sanıtarııalyq-gıgıenalyq toraptardy kútip-ustaý, jol boıyndaǵy servıs obektilerin salý jáne taǵy basqalary kezinde shyǵyndardyń bir bóligin óteý túrinde qoldaý alatyn bolady», - dep atap ótti «KAZAKH INVEST» UK» AQ Servıstik qoldaý departamentiniń dırektory Alıda Túıebekova.
Munan bólek, «bed tax»-tiń tikeleı balamasy bolyp tabylatyn sheteldikter úshin týrıstik jarna sııaqty jańa engizilim qoldanylatyn bolady. Bul - týrısterge jataqhanalardy, qonaq úılerdi, qalalar men aýdandardaǵy jalǵa beriletin turǵyn úılerdi qospaǵanda, týrısterdi ornalastyrý oryndarynda bolǵan árbir táýlik úshin alynatyn tólem. Týrıstik jarna operatorlary sheteldikter úshin alynǵan qarajatty jergilikti bıýdjetke aýdarady. Jarna mólsherin ákimdikter anyqtaıdy.
Sonymen birge kelý týrızmi salasyndaǵy týroperatorlardyń shyǵyndaryn sýbsıdııalaý erejeleri kúshine endi. Árbir tartylǵan sheteldik týrıst úshin týroperatorlarǵa 15 000 teńge mólsherindegi shyǵyn sýbsıdııalanady.