Qazaqstanda sheteldik tasymaldaýshylarǵa baqylaý kúsheıtildi

ASTANA. QazAqparat - Sheteldik tasymaldaýshylardyń elimizdiń aýmaǵynda kólik zańnamasyn buzý faktileri kóbeıip ketti. Bul týraly búgin Ortalyq kommýnıkatsııalar qyzmetindegi brıfıngte QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.

«Sońǵy ýaqytta sheteldik tasymaldaýshylardyń elimizdiń aýmaǵynda kólik zańnamasyn buzý faktileri kóbeıip ketti. Sondyqtan sońǵy aptanyń ishinde biz baqylaýdy kúsheıtip jatyrmyz. Bul jumystar tek qana otandyq  tasymaldaýshylardyń múddesin qorǵaý úshin jasalýda. Búgingi kúni Qazaqstan Respýblıkasy aýmaǵynda sheteldik tasymaldaýshylarǵa baqylaý kúsheıtildi. Alǵashqy 7 kúnniń qorytyndysynda 2721 kólik quraly tekserildi», - dedi mınıstr.

Onyń aıtýynsha, shara barysynda 10-nan astam eldiń kólik quraldary tekserilgen. Nátıjesinde 193 buzýshylyq anyqtalǵan.

«Buzýshylyqtardyń basym bóligi, ıaǵnı 60 paıyzy qyrǵyzstandyq tasymaldaýshylarǵa tıesili bolyp otyr. Jalpy jyldyń basynan beri 58 myńnan astam sheteldik kólik tekserilip, 2500-den astam buzýshylyq anyqtaldy. Bul rette de buzýshylyqtardyń myńǵa jýyǵy qyrǵyzstandyq avtokólikterge tıesili boldy», - dedi Jeńis Qasymbek.

Mınıstrdiń sózine qaraǵanda, osyǵan baılanysty shekara mańyndaǵy aımaqtarǵa qosymsha jyljymaly kóliktik baqylaý beketteri jiberildi. Jergilikti polıtsııa qyzmeti, ekonomıkalyq tergeý qyzmeti jáne memlekettik kiris organdary birlesip, shekara asyp jatqan kólik quraldaryna táýliktik baqylaýdy qamtamasyz etýde.