Qazaqstanda sheteldik kólikti zańdastyrýǵa arnalǵan servıs iske qosyldy

ASTANA. QazAqparat – eGov.kz portaly men eGov Mobile mobıldik qosymshasynda shetelden ákelingen kólikterdi zańdastyrýǵa arnalǵan servıs iske qosyldy, dep habarlaıdy QazAqparat «Ulttyq aqparattyq tehnologııalar» AQ-ǵa silteme jasap.

Servıs jeke tulǵalar úshin 2023 jyldyń 23 qańtarynan bastap 1 shildege deıin qoljetimdi bolady.

QR Úkimetiniń 2023 jylǵy 11 qańtardaǵy №13 qaýlysyna sáıkes, qazaqstandyqtar Qazaqstan Respýblıkasyna 2022 jyldyń 1 qyrkúıegine deıin ákelingen avtokólikterdi eGov.kz portalynyń «Avtokólikti zańdastyrý úshin tekserý» atty jańa servısi arqyly zańdastyra alady. Jańa servıs tek elektrondyq ótinish berýge arnalǵan. Ótinish boıynsha B (jeńil avtomobılder) jáne D1 (mıkroavtobýstar) sanatyndaǵy kólikterdiń kelesi talaptarǵa saı kelý-kelmeýi tekseriledi:

- kóliktiń 2022 jyldyń 1 qyrkúıegine deıin ákelinýi;

- kóliktiń qandaı da bir qylmysqa qatysy bolmaýy;

- kedendik rásimderden túgel ótýi.

Jańa servısti Elektrondyq úkimet portalynyń basty betindegi «Servıster» bóliminen jáne «Kólik jáne kommýnıkatsııalar» - «Avtomobıl kóligi» bóliminen tabýǵa bolady. Al eGov Mobile mobıldik qosymshasynda «Júrgizý jáne kólik» bólimine kirý qajet.

«Sheteldik avtokólikterdi zańdastyrý rásimi eki kezeńde júredi. Avtokólik ıeleri aldymen, eGov.kz portalynda ótinish berýi qajet, sodan keıin avtokólikti tekserý, kólik quralyn tekserýden ótkizý, tirkeý alymyn tóleý jáne memlekettik nómirdi alý úshin mamandandyrylǵan Halyqqa qyzmet kórsetý ortalyǵyna júginýi kerek»,- dep atap ótti «Ulttyq aqparattyq tehnologııalar» AQ basqarma tóraǵasy Rostıslav Konıashkın.

EGov.kz portalynda elektrondyq ótinish berý úshin kólik ıesinen talap etiledi:

- turǵylyqty jeri boıynsha turaqty tirkeýde bolýy;

- Qazaqstan Respýblıkasy azamattyǵynyń bolýy;

- mobıldi azamattar bazasynda (MAB) tirkelgen bolýy;

- avtokóliktiń jáne kólik quralynyń burynǵy ıesi týraly barlyq qajetti málimetti toltyrýy;

- tekserýge suraý jiberýi;

- kólik quralyn tekserýden ótkizý úshin mamandandyrylǵan HQKO-ǵa elektrondy kezekti brondaýy.

Qyzmet kórsetý nátıjesi eGov.kz paıdalanýshycynyń jeke kabınetine 15 mınýt ishinde habarlama retinde jiberiledi nemese ótinishti qanaǵattandyrýdan bas tartý týraly dáleldi jaýap keledi.

Habarlamany alǵannan keıin avtomobıl ıesine avtokólikti tekserý, kólik quralyn tirkeýden ótkizý, 200 myń teńge mólsherinde tirkeý alymyn tóleý, memlekettik nómir men kólik quralynyń kýáligin alý úshin avtoHQKO janyndaǵy tekserý pýnkterine kólik quralyn usyný qajet.

Jańa servısti «Ulttyq aqparattyq tehnologııalar» AQ, QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik qyzmetter komıteti men QR Іshki ister mınıstrligi birlesip jasaǵan.