Qazaqstanda sheteldik ınternet-dúkenderge arnaıy salyq salynýy múmkin

NUR-SULTAN. QazAqparat – Qazaqstanda sheteldik ınternet-dúkenderge arnaıy salyq salynýy múmkin. Mundaı jospardyń bary týraly Saýda jáne ıntegratsııa mınıstrliginiń alqa otyrysynda «Atameken» ulttyq kásipkerler palatasy basqarma tóraǵasynyń orynbasary Narıman Ábilshaıyqov aıtyp berdi, dep habarlaıdy QazAqparat tilshisi.

«Birinshiden, elektrondyq kommertsııadaǵy tutynýshylardyń quqyǵyn qorǵaý boıynsha normatıvtik sharalardy odan ary kúsheıtý kózdelgen. Taýarlardy qaıtarýǵa, kórsetiletin qyzmetterdiń sapasy men tutynýshylardyń daý-sharyn sheshýge baılanysty problemalar áli de bar», - dedi Narıman Ábilshaıyqov.

Bul baǵytta ekinshi jospar – saýdany barynsha zańdy sheńberge, áleýmettik jelige ákelip, kóleńkeden shyǵarý bolyp otyr.

«Búgingi kúni áleýmettik jeliler arqyly satylatyn taýarlar kólemi jaıly málimet joqtyń qasy. Bul naryq zań talaptary saqtalmaǵan «sur aımaqqa» jatady. Resmı júktemeden qutylǵan beıresmı sektordyń shaǵyn sýbektileri negizsiz básekelik artyqshylyqtarǵa ıe bolyp keledi», - dep atap ótti spıker.

Onyń aıtýynsha úshinshi jospar – elektrondy saýdadaǵy qazaqstandyq operatorlardy qoldaý maqsatynda zańnamalyq turǵyda otandyq jáne sheteldik ınternet-dúkenderdiń tepe-teńdigine qol jetkizý josparlanǵan.

«Salyq tólemderin júrgizbegendikten, sheteldik saýdagerler otandyq saýda alańdarynyń aldynda baǵa jaǵynan basymdyqqa ıe bolyp keledi», - dedi Narıman Ábilshaıyqov.