Qazaqstanda «shetel agentteri» týraly zańdy engizý qarastyrylmady - Adam quqyqtary jónindegi ýákil

ASTANA. QazAqparat – Qazaqstanda «shetel agentteri» týraly zańdy engizý qarastyrylyp jatqan joq. Bul týraly Adam quqyqtary jónindegi ýákil Artýr Lastaev aıtty, dep habarlaıdy QazAqparat tilshisi.

«Bul másele kún tártibinde joq ekenin bilemin. Eger osyndaı bastama bolsa, onda ózimiz tıisti saraptama jasaımyz. Bizde mundaı jumystardy atqarýǵa qaýqarly shtat jasaqtalǵan, olardyń tıisti mamandyqtar boıynsha bilimi bar. Buǵan naqty baǵa berip, mindetti túrde óz pikirimizdi bildiremiz», - dedi Artýr Lastaev elordada tilshilerge bergen suhbatynda.

Sonymen qatar ol shetelden qarjy alatyn tulǵalardyń tizilimin jasaý máselesine qatysty pikir bildirdi.

«Qazirgi kezde memlekettik kirister organdary bul saıasatty salyq salý maqsatynda júzege asyryp otyr. Bizge osy ýaqytqa deıin fıskaldyq saıasat aıasynda adam quqyqtaryna nuqsan kelip jatqany týraly eshqandaı shaǵym túsken joq», - dedi A. Lastaev.

Budan buryn habarlanǵandaı, Memlekettik kirister komıteti shetelden qarjy alatyn tulǵalardyń tizilimin jasaýǵa qatysty túsinikteme berdi.