Qazaqstanda shekara qaýipsizdigine qatysty jańa qujatty daıyndaý máselesi pysyqtalyp jatyr

ASTANA. QazAqparat – Qazaqstanda shekara qaýipsizdigin qamtamasyz etýde jańa baǵdarlamalyq qujatty daıyndaý máselesi pysyqtalyp jatyr. Bul týraly elordada Búkilarmııalyq keńestiń otyrysynda QR UQK Tóraǵasynyń orynbasary – Shekara qyzmetiniń dırektory, general-maıor Erlan Aldajumanov aıtty, dep habarlaıdy QazAqparat tilshisi.

«Ýshyǵyp kele jatqan geosaıası shıelenis pen gıbrıdti qaqtyǵystardyń taralýy jańa syn-qaterlerge alyp keleýi múmkin. Bul jaǵdaı shekara qaýipsizdigin nyǵaıtý boıynsha keshendi is-shara qabyldaýǵa mindetteıdi. Osyǵan oraıda shekara qaýipsizdigin qamtamasyz etý turǵysynda jańa baǵdarlamalyq qujatty daıyndaý máselesin pysyqtap jatyrmyz», - dedi Erlan Aldajumanov.

Onyń aıtýynsha, bul qujatty júzege asyrý shekaralyq aýmaqta ulttyq múddeni qorǵaý júıesin jańa deńgeıge kóterip, shekara qyzmetiniń odan ári damýyna tyń serpin beredi.

Budan buryn habarlanǵandaı, Memleket basshysy Qasym-Jomart Toqaevtyń qatysýymen ótetin Búkilarmııalyq keńestiń otyrysy bastaldy.

Prezıdent otandyq qorǵanys ónerkásibinde shyǵarylatyn ónimder qataryn keńeıtýdi tapsyrdy.

Shekara qyzmetiniń dırektory, general-maıor Erlan Aldajumanov shekarany kúzetýdiń jańa tehnıkalyq quraldary synaqtan ótip jatqanyn aıtty.