Qazaqstanda «Sháken juldyzdary» kınofestıvali qaıta jandanady

<p>ALMATY. KAZINFORM &mdash; Almatyda ótip jatqan &laquo;Eýrazııa&raquo; halyqaralyq kınofestıvaliniń ashylýynda Mádenıet jáne aqparat mınıstri Aıda Balaeva qazaqstandyq kınoındýstrııa qalaı damıtyny týraly aıtty.</p>

Aıda Balaeva qazir otandyq kınoındýstrııa túbegeıli ózgeristerge ushyrap jatqanyn aıtty. Birinshi kezekte memleket pen kınoóndirýshiler arasyndaǵy ózara is-qımyl tetikteri, onyń ishinde qarjylandyrý máseleleri jetildirilip jatyr.

«Árıne, qıyndyqtar bar, biraq biz kınoındýstrııany maqsatty túrde damytýdy, zańnamalyq bazany jetildirýdi, qarjylandyrý jáne kontent óndirý protsesterin barynsha ashyq etýdi jalǵastyramyz. Budan bólek, daryndy rejısserlerge jańa múmkindikterdi ashýǵa kómektesýdi, kınoóndiristiń úzdik jobalaryn jandandyrýdy jáne qoldaýdy toqtatpaımyz. Sondyqtan da bul kınofestıval ótti (Eýrazııa — avtor eskertpesi). Dál osy sebepti biz bolashaqta aty ańyzǵa aınalǵan «Sháken juldyzdary» kınofestıvalin qaıta jańǵyrtýǵa bar kúsh-jigerimizdi salamyz», — dedi ol.

Mınıstr Sháken Aımanov atyndaǵy kınostýdııadaǵy negizgi ózgerister Qazaqstannyń kınoındýstrııasy úshin mańyzdy bolatynyn atap ótti.

«Birqatar zańnamalyq bastamanyń arqasynda kınostýdııa óz damýynyń jańa dáýirine qadam basyp jatyr. Kelesi jyldan bastap Mádenıet jáne aqparat mınıstrligi kınostýdııany tikeleı qarjylandyrýǵa zańdy quqyna ıe bolady. Zań jobasy osy jyldyń sońyna deıin Prezıdenttiń qol qoıýyna jiberiledi. Eger qabyldansa, elimizdegi fılmderge bólinetin jalpy qarjynyń kem degende 30 paıyzy tikeleı «Qazaqfılmge» baǵyttalady. Bul kóptegen ózekti máseleni sheshedi, kınostýdııa murasyn saqtaıdy, onyń qarjylyq jaǵdaıyn turaqty etedi jáne jumysyn tıimdi etpek», — dep qosty ol.

Buǵan deıin Aıda Balaeva Qazaqfılmniń bolashaǵy týraly aıtqan bolatyn. 

Eske salaıyq, Almatyda «Eýrazııa» halyqaralyq kınofestıvali saltanatty túrde ashyldy.
Halyqaralyq «Eýrazııa» kınofestıvali 24-30 qarasha aralyǵynda ótedi. Festıvalge 15-ten astam el qatysyp jatyr.

Aýqymdy sharany QR Mádenıet jáne aqparat mınıstrligi men Sháken Aımanov atyndaǵy «Qazaqfılm» ulttyq kınostýdııasy uıymdastyrǵan.

Aıta keteıik, bıyl konkýrs baǵdarlamasynda úsh qurlyqtan kelgen 12 fılm usynylady.

Konkýrs Bangladesh pen Ońtústik Koreıadan bastap, Avstrııa men Katarǵa deıingi elderdiń týyndylaryn qamtıdy. Eýropa, Azııa jáne Taıaý Shyǵystan kelgen shyǵarmashylyq toptar ámbebap taqyryptar men jergilikti kontekstti biriktiretin jumystardy usynbaq.

Kınofestıvaldiń tolyq baǵdarlamasymen silteme arqyly tanysa alasyz.