Qazaqstanda senim telefony arqyly 100-den asa sýıtsıdke tosqaýyl qoıylǵan

ASTANA. QazAqparat - Elimizde Qazaqstannyń balalary men jastaryna arnalǵan ulttyq senim telefony (111) qyzmetiniń arqasynda óz-ózine qol salý boıynsha 103 jaǵdaıǵa jol berilmegen, dep habarlaıdy «QazAqparat» HAA tilshisi.

Bul týraly búgin OKQ-da ótken baspasóz máslıhaty barysynda QR Parlamenti Májilisiniń depýtaty, QR Bala quqyqtary jónindegi ýákili Zaǵıpa Balıeva málim etti. Jıynǵa balalar jáne jastar uıymynyń basshylary men músheleri, BUU Balalar qorynyń (ıÝNISEF) jáne Ortalyq Azııadaǵy PRI Halyqaralyq túrme reformasynyń óńirlik ókildiginiń ókilderi qatysty.

«Qazirgi tańda balalar 111 nómiri arqyly kómek alýǵa júginse, olardyń pikirin, máselelerin tyńdaý úshin, qıyndyqtaryn bilý úshin barlyq jaǵdaı jasalǵanyn atap ótkim keledi. Óıtkeni qazirgi zamanda balalardyń kóptegen qıyndyqtary men talaptary bar. Keıbir kezderde olar ómirdiń ózi týyndatqan suraqtarǵa jaýap taba almaı qınalady. Qazir biz olarǵa kez kelgen kúndizgi jáne túngi ýaqytty habarlasýy úshin barlyq jaǵdaıdy jasadyq», - deıdi Zaǵıpa Balıeva.

Onyń aıtýynsha, senim telefony qyzmet atqara bastaǵannan beri 2016 jyldyń qarasha aıynan bastap 2 mıllıonǵa jýyq qońyraý kelip túsken. 5 myń balaǵa jedel kómek kórsetilip, onyń ishinde 1 737 ótinish boıynsha psıhologııalyq kómek, 473 jaǵdaı boıynsha zańgerlik kómek kórsetilgen. Senim telefonynyń arqasynda 103 sýıtsıd jaǵdaıy, balalarǵa qatigezdik kórsetýdiń 42 jaǵdaıyna tosqaýyl qoıylǵan. Sonymen birge, eresekter tarapynan seksýaldyq zorlyq-zombylyqqa ushyraǵan 7 balaǵa psıhologııalyq kómek berilgen.