Qazaqstanda saılaý protsesin demokratııalandyrýǵa den qoıylyp keledi - Belarýs sarapshysy

NUR-SULTAN. QazAqparat - Qazaqstandaǵy Prezıdent saılaýy qoǵamda ártúrli saıası kózqarastaǵy toptardyń baryn dáleldeı tústi. Sheteldik sarapshy, Belarýs Respýblıkasy Strategııalyq jáne syrtqy saıası zertteýler ortalyǵynyń dırektory Arsenıı Sıvıtskııdiń pikiri osyndaı, dep habarlaıdy QazAqparat tilshisi.

««Exit poll» saýalnamasynyń da nátıjesi de, jalpy Ortalyq saılaý komıssııasynyń qorytyndysy da qazaqstandyq jáne sheteldik kóptegen sarapshylardyń boljamyn rastap otyr. Shynynda da, Qasym-Jomart Toqaevtyń osyndaı shamadaǵy daýysty alatyny boljanǵan. Sebebi, Toqaev óziniń kampanııasyn tsentrıstik ustanym boıynsha júrgizdi. Osy faktor aınalyp kelgende qoǵamdy úılestire alatyn sıpatqa ıe. Bul jolǵy Qazaqstandaǵy Prezıdent saılaýynyń ereksheligi - ártúrli saıası jáne ıdeologııalyq baǵyttaǵy kandıdattardyń bolýynda», - dedi Arsenıı Sıvıtskıı.

Sheteldik sarapshy, sondaı-aq, Ámirjan Qosanovtyń jalpy daýystyń 16 paıyzyna ıe bolýy salmaqty nátıje ekenin atap ótti.

«Bul degenimiz qazaqstandyq qoǵamda ártúrli saıası kózqarastaǵy toptardyń baryn dáleldeı tústi. Keleshekte Qasym-Jomart Toqaev pen «Nur Otan» partııasy osynaý 16 paıyz úshin daýys bergen azamattardyń ustanymyn esepke alary anyq. Jalpy, Qazaqstandaǵy saılaý kampanııasy ashyq ári básekeli ótkenin atap ótken jón. Qazaqstan bıligi - ishki jáne syrtqy baǵyttaǵy legıtımdikke barynsha den qoıyp otyrǵanyn baıqaımyz. Saılaý kampanııasy da, nátıjesi de osyny kórsetti», - dedi belarýstyq sarapshy.

Arsenıı Sıvıtskııdiń pikirine súıensek, Qazaqstanda saılaý protsesin demokratııalandyrýǵa den qoıylyp kele jatqany baıqalady. Sheteldik sarapshy bul rette 2005 jyldan beri kandıdattar arasyndaǵy tikeleı efırdegi teledebattyń jandanýyn argýment retinde mysalǵa keltirdi.

«Ol jerde árbir kandıdat óz baǵdarlamasymen tanystyrý múmkindigine ıe boldy. Osy qadamdardyń bári de barynsha legıtımdikpen qamtýdy maqsat etkeni anyq», - dedi sheteldik sarapshy.

Eske sala ketsek, búgin QR Ortalyq saılaý komıssııasy 2019 jyldyń 9 maýsymynda ótken kezekten tys prezıdenttik saılaýda kandıdattarǵa saılaýshylardyń qansha daýys bergendigin jarııa etken bolatyn.

«Qazaqstan Respýblıkasy boıynsha Jambyl Ahmetbekov 167 249 daýys nemese saılaýshylardyń 1,83 protsent daýysyn, Danııa Espaeva 478 153 daýys nemese saılaýshylardyń 5,2 protsent daýysyn, Ámirjan Qosanov 1 472 733 daýys nemese saılaýshylardyń 16,02 protsent daýysyn, Tóleýtaı Rahymbekov 294 271 daýys nemese 3,2 protsent daýysyn, Amangeldi Taspıhov 190 304 daýys nemese saılaýshylardyń 2,07 protsent daýysyn, Qasym-Jomart Toqaev 6 504 054 nemese saılaýshylardyń 70,76 protsent daýysyn, Sádi-Bek Túgel 84 348 daýys nemese saılaýshylardyń 0,92 protsent daýysyn jınady», - dedi QR OSK tóraǵasynyń orynbasary Konstantın Petrov.