Qazaqstanda saıası qýǵyn-súrgin máseleleri boıynsha qor quryldy

NUR-SULTAN. QazAqparat – Qazaqstanda saıası qýǵyn-súrgin máseleleri boıynsha muraǵat materıaldarynyń arnaýly qory quryldy. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

«Barlyq materıaldar qýǵyn-súrgin túrleri jáne qýǵyn-súrginge ushyraǵandardyń sanaty boıynsha jikteledi. Shaǵyn komıssııalardyń jetekshileri Bilim jáne ǵylym, Mádenıet jáne sport mınıstrlikteriniń qyzmetkerlerimen birge óńirlik komıssııalardyń qzmetine baqylaý jasaý úshin aımaqtarǵa kóshpeli ınspektsııamen shyǵyp turady», - dedi Eraly Toǵjanov Ortalyq kommýnıkatsııalar qyzmetindegi baspasóz máslıhatynda.

Ol ınspektsııa sonymen qatar óńirlik komıssııalardyń qalypty jumysyna qajetti ádistemelik jáne basqa da kómekterdi kórsetetindigin basa aıtty.

«Mádenıet jáne sport mınıstrligi Ulttyq muraǵat pen Ortalyq memlekettik muraǵat bazasynda saıası qýǵyn-súrgin máseleleri jónindegi muraǵat materıaldarynyń arnaýly qoryn qurdy. Búginde atalǵan muraǵattarda saıası qýǵyn-súrgin qurbandaryna qatysty myńnan astam muraǵattyq is saqtalyp otyr. Bul bizde endi ǵana bastalǵan aýqymdy jumystyń bir bóligi ǵana ekeni sózsiz. Atalǵan qor komıssııa qyzmetiniń aıasynda qupııa belgisi alynan qujattarmen tolyqtyrylyp otyrady», - dedi Premer-Mınıstrdiń orynbasary.