Qazaqstanda saýda saıasaty tujyrymdamasy ázirlenip jatyr

NUR-SULTAN. QazAqparat – Elimizde saýda saıasaty týraly tujyrymdama ázirlenip jatyr. Bul týraly QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarın málim etti, dep habarlaıdy QazAqparat tilshisi.

«Qazir Saýda mınıstrliginde saýda saıasaty boıynsha tujyrymdama ázirlep jatyrmyz. Bul mindetti túrde bıznespen birlesip jasap, jumys isteıtin qujat bolýy kerek. Bul týraly elordadaǵy keńeste iri bıznes ókilderin habardar ettim. Sonymen qatar tujyrymdama jaıynda Almaty oblysynyń turǵyndary jáne kásipkerlerimen kezdeskende aıttym. Biz memleket pen bıznes úshin tıimdi qujat jasaýǵa múddeli barlyq azamattan usynystar kútemiz», - dep jazdy Serik Jumanǵarın Facebook paraqshasynda.

Sondaı-aq, Premer-Mınıstrdiń orynbasary saýda saıasaty tujyrymdamasyna qatysty usynystardy Saýda jáne ıntegratsııa mınıstrligine joldaýǵa bolatynyn aıtty.

Onyń aıtýynsha, kelip túsken usynystar men pikirler jumys tobynda qaralady.