Qazaqstanda sanıtarlyq-gıgıenalyq toraptary bar janarmaı quıý beketteri salynady

NUR-SULTAN. QazAqparat – Bıyl respýblıkalyq jáne jergilikti mańyzy bar 9,5 myń shaqyrym avtojol jóndeldi. Bul týraly QR Indýstrııa jáne ınfraqurylymdyq damý mınıstri Beıbit Atamqulov aıtyp berdi, dep habarlaıdy QazAqparat tilshisi.

Mınıstrdiń sózinshe, jyl sońyna deıin 2,6 myń shaqyrym jańa avtojolda qozǵalys ashylady. Myń jarym shaqyrym jolda kúrdeli jáne ortasha jóndeý júrgiziledi.

«Búginde 1 815 nysan jol boıyndaǵy servıste jumys isteıdi, onyń 894-i nemese 49% Ulttyq standart talaptaryna sáıkes keledi. Mınıstrlik oblys ákimdikterimen birlesip, yntymaqtastyq týraly kelisim aıasynda Ulttyq standartqa sáıkes keletin jol boıyndaǵy servıs nysandaryn kóbeıtý boıynsha jumys isteıdi», - dedi ol Ortalyq kommýnıkatsııalar qyzmetinde ótken esep berý brıfınginde.

Spıker «Qazavtojol» kompanııasynyń sanıtarlyq-gıgıenalyq toraptary bar 23 janarmaı quıý stantsııasyn salatynyn, odan bólek, 70-ke jýyq sanıtarlyq-gıgıenalyq torap ornatýdy josparlap otyrǵanyn jetkizdi. Osylaısha, jol boıyndaǵy qyzmet kórsetý nysandarynyń 58% Ulttyq standart talaptaryna sáıkes keletin bolady.

«2020-2025 jyldarǵa arnalǵan «Nurly jol» memlekettik baǵdarlamasynyń mańyzdy mindeti – jergilikti jol jelisiniń sapasyn arttyrý men turǵyndardy úıge deıingi jolmen qamtamasyz etý. Jergilikti jeliniń jalpy uzyndyǵy 70,9 myń km quraıdy. Jergilikti jelini damytýdy qarjylandyrýda jyl saıynǵy nysanaly transfertterdi bólý jolymen mınıstrlik pen jergilikti atqarýshy organdar arasyndaǵy tepe-teńdik tásili qoldanylady. Bıyl 4 myń shaqyrym jol jóndeledi, oǵan 30 myń adam tartylady jáne jyl sońyna deıin jergilikti jeli joldarynyń 75% jaqsy jáne qanaǵattanarlyq jaǵdaıǵa keltiriledi», - dedi B. Atamqulov.

Onyń aıtýynsha, 2025 jylǵa qaraı jergilikti jeliniń 27 myń shaqyrym avtojoly jóndeledi. Bul oblystyq jáne aýdandyq mańyzy bar joldardyń 95% jaqsy jáne qanaǵattanarlyq kúıge keltirýge múmkindik beredi.