Qazaqstanda samokattardyń qozǵalysyn retteıtin jańa belgi paıda bolady
«Jolda elektr somokattardyń qozǵalysyn retteýge arnalǵan jańa belgi paıda bolady. Bul turǵyda ol jol erejesindegi basqa da jol belgileri sııaqty jalpyǵa ortaq bolady», - dedi Evgenıı Bolgert Senatta tilshiler suraǵyna jaýap bere otyryp.
Qaısar Sultanbaev jeke adamdardyń menshigindegi samokattardyń jyldamdyǵyn baqylaý múmkin bolmaı turǵanyn aıtty.
Aıta keteıik, búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine jol júrisin uıymdastyrý máseleleri boıynsha ózgerister men tolyqtyrýlar engizý týraly» Zańy maquldandy.
«Elektrondyq samokat» uǵymy engizilip, ol eń joǵary konstrýktıvtik jyldamdyǵy saǵatyna 25 kılometrden aspaıtyn kólik quraly dep tanylady jáne olardyń qozǵalysy úshin tıisti oryndar aıqyndaldy.
Atap aıtqanda, Zańmen engizilgen sharttar men tyıymdardy saqtaı otyryp, joldyń júris bóliginiń oń jaq sheti boıynsha elektr samokattardyń júrýine ruqsat etiledi. Bul turǵyda júrgizýshiniń 18 jasqa tolýy, kez kelgen sanattaǵy kólik quralyn basqarý quqyǵyna júrgizýshi kýáligi men shlemniń bolýy, al táýliktiń qarańǵy ýaqytynda qozǵalý kezinde basqa kólik quraldarynyń júrgizýshilerine kórinýi úshin tıisti jaryq túsiretin belgilerdi taǵý eskerilgen.
Elektr samokatyna trotýar nemese jaıaý júrginshiler jolymen saǵatyna 6 km-den aspaıtyn jyldamdyqpen júrýine ruqsat etiledi. Shaǵyn elektr kólik quraldary men elektr samokattary júrgizýshileriniń quqyqtary men mindetteri belgilenedi.