Qazaqstanda salynýy yqtımal atomdyq reaktordyń quny qansha bolmaq

NUR-SULTAN. QazAqparat – QR Energetıka mınıstrligi atom energetıkasy jáne ónerkásibi departamentiniń dırektory Jaslan Qasenov Qazaqstanda salynýy yqtımal atomdyq reaktordyń boljamdy qunyn atady, dep habarlaıdy QazAqparat tilshisi.

«Halyqaralyq tájirıbe qýaty 1000-1200 MVt bolatyn bir atom-energetıkalyq blok qurylysynyń quny shamamen 5 mlrd dollar bolatynyn kórsetip otyr. Bul shamalap aıtylǵan soma. Qaıtalap aıtaıyn, halyqaralyq tájirıbe osylaı kórsetip otyr. AES qurlysynyń álemdik naryǵy osyndaı baǵa kórsetip tur. Árıne, budan anaǵurlym naqty somany stansa ornatatyn jetkizýshi kompanııany anyqtap, kelissóz júrgizgen kezde ǵana aıtýǵa bolady. Óıtkeni AES quny kóptegen faktorlarǵa baılanysty», - dedi mınıstrlik ókili.

Mamannyń aıtýynsha, ázirge bul joba qandaı kózden qarjylandyrylatyny da belgisiz.

«Qarjylandyrý kózi de kelissózder kezinde naqtylanady. Buǵan deıin de aıtqanymdaı, bul jobaǵa aqsha tartýdyń túrli tetikteri bar», - dedi Jaslan Qasenov.