Qazaqstanda salyqtyq jeńildikterdi jetildirýge ǵalymdar tartylýy múmkin

ASTANA. QazAqparat - Ulttyq ekonomıka mınıstrligi salyqtyq jeńildikter júıesin jetildirý sharalaryn ázirleýge ǵalymdardy tartýdy josparlaıdy. Búgin Senatta salyqtyq tıimdilikter máselesine arnalǵan «dóńgelek ústel» otyrysynda Ulttyq ekonomıka vıtse-mınıstri Marat Qusaıynov osylaı málim etti.

Jıyn barysynda senatorlar tarapynan salyqtyq jeńildikterge qatysty ǵylymı negizdemeler usyný týraly máseleler kóterilgen bolatyn. Mundaı usynysty vıtse-mınıstr de qoldaıtynyn bildirdi. «Men osy baǵytta aýqymdy jumystardyń qajettiligine kelisemin, al ondaı jumysqa bizdiń shamamyz jetpeýi múmkin, sondyqtan da syrttan zertteýshilerdi tartýymyz qajet. Zertteý ortalyǵynyń ǵalymdary kerek. Búgingi jıynnyń qorytyndysy boıynsha men mınıstrge usynyspen shyǵyp, onda Ekonomıkalyq zertteýler ınstıtýtynyń áleýeti jetse, solarǵa tapsyrys berý nemese Dúnıejúzilik bankpen birlese otyryp, jańa zertteýler júrgizý máselesin kótergim keledi», - dedi M. Qusaıynov.

Onyń paıymynsha, keshendi zertteýler negizinen qazaqstandyq salyqtyq jeńildikter men olardy jetildirý júıelerine qatysty bolyp tabylady.

Toqtala ketetin jaıt, otyrysta vıtse-mınıstr jalpy somasy 200 mlrd. teńgeni quraıtyn salyqtyq jeńildikterden bas tartylatynyn aıtqan bolatyn.