Qazaqstanda salyqtyq tekserýler sany azaıdy - Qarjy mınıstrligi

ASTANA. QazAqparat - 2017 jyly elimizdegi salyqtyq tekserýler sany 45 paıyzǵa tómendedi. Bul týraly búgin Ortalyq kommýnıkatsııalar qyzmetindegi baspasóz máslıhatynda QR Qarjy mınıstrligi Memlekettik kirister komıteti tóraǵasynyń orynbasary Mádı Takıev aıtty, dep habarlaıdy QazAqparat.

«2017 jyly Bas prokýratýramen jáne «Atameken» Ulttyq kásipkerler palatasymen tekserý túrindegi bızneske júktemeni birtindep tómendetý jáne qylmystyq qýdalaý orbıtasyna shyǵarmaý jóninde bastalǵan birlesken jumys bıyl da jalǵasýda. Ótken jyly Memleket basshysy salyqtyq tekserýler sanyn 37,5 paıyzǵa tómendetýdi tapsyrǵan bolatyn. Biz ótken jyldyń qorytyndysyna atalǵan kórsetkishti 45 paıyzǵa deıin nemese tekserýler sanyn 76794-ten 42018-ge deıin qysqarta aldyq», - dedi ol.

Onyń aıtýynsha, 2018 jyldyń 1 qańtarynan jańa Salyq kodeksiniń  engizilýine baılanysty qarsy tekserýler sanynyń 25 paıyzǵa tómendeıtindigi kútilýde.

«Jańa Salyq kodeksi aıasynda jospardan tys tekserýlerdiń negizdemelerin taǵaıyndaý jaıttary qaraldy. Eger buǵan deıin 32 negizdeme bolsa, qazir olardyń 12-si ǵana qaldy. Zańdy tulǵalardyń jabylýy nemese jeke kásipkerler qyzmetin toqtatqan kezde aýdıtorlyq uıymdardyń salyǵy boıynsha aýdıtti júzege asyrý úshin sharttar jaqsartyldy. Jeke praktıkamen aınalysatyn jeke tulǵalardyń qyzmeti salyqtyq tekserý júrgizilmesten toqtatylatyn bolady», - dedi Mádı Takıev.