Qazaqstanda salyqtyq raqymshylyq bastalady

ASTANA. QazAqparat - Jańa jylda elimizde shaǵyn jáne orta bıznes úshin salyqtyq raqymshylyq uıymdastyrylady. Kásipkerler negizgi qaryzdy tólegen jaǵdaıda aıyppuldar men ósimaqydan bosatylady, dep habarlaıdy QazAqparat tilshisi.

QR Qarjy mınıstrliginiń málimetine sáıkes, búginde salyqtyq raqymshylyqqa baılanysty keıbir zańnamalyq aktilerge ózgerister engizý josparlanyp otyr. Osyǵan oraı, arnaıy zań jobasy ázirlendi. Atalǵan qujat boıynsha salyqtyq raqymshylyq kelesi jyldyń aıaǵyna deıin jalǵasady. Al aıyppuldardy men ósimaqylardy alyp tastaý sharalary naýryz aıynda bastalady.
«2018 jyldyń 1 qazanyna deıin jınaqtalǵan qaryzdyń kelesi jyldyń aıaǵyna deıin tóleý kerek. Sonda kásipkerler barlyq aıyppuldar men ósimaqylardan bosatylady», - deıdi Memlekettik kirister komıtetiniń tóraǵasy Marat Sultanǵazıev.
Onyń aıtýynsha, salyqtyq raqymshylyqqa temeki, alkogol men ken óndirý salasyndaǵy iri kásipkerlik nysandar ilinbeıdi. Qazirgi esepke sáıkes, raqymshylyqqa 90 myńǵa jýyq shaǵyn jáne orta bıznes ókilderi qatysa alady.

«Olardyń jalpy qaryzy 340 mıllıard teńgeni quraıdy. Sonyń ishinde negizgi qaryzdyń somasy - 210 mıllıard. Dál osy qaryz tólense, memleket 122 mıllıard teńgeniń ósimaqysyn, sondaı-aq, 7,3 mıllıard teńgeniń aıyppulyn syzyp tastaıdy. Sonda kásipkerler qosymsha 130 mıllıard teńgeni tóleýden bosatylady», - dep atap kórsetti M.Sultanǵazıev.
Resmı aqparat boıynsha qaryzdyń basym bóligi - 123 mlrd teńge (37%) saýda salasyna tıesili. Odan keıin qurylys - 98 mlrd teńge (30 protsent) jáne taý-ken ónerkásibi - 35 mlrd teńge (10,7 protsent).
Aıta keteıik, ótken jyly 5 qazanynda Qazaqstan Resýpblıkasynyń Prezıdenti Nursultan Nazarbaev Qazaqstan halqyna «Qazaqstandyqtardyń ál-aýqatynyń ósýi: Tabys pen turmys sapasyn arttyrý» Joldaýyn jarııalaǵan bolatyn.
Sol kezde Prezıdent 2019 jyldyń 1 qańtarynan bastap shaǵyn jáne orta bıznes úshin salyqtyq amnıstııany ótkizýdi tapsyrdy. «Bıznes jumysyn taza paraqtan bastaýy úshin 2019 jyldyń 1 qańtarynan shaǵyn jáne orta bıznes úshin salyqtyq amnıstııa júrgizýge kirisýdi tapsyramyn. Degenmen, barlyǵy da tegis bolyp otyrǵan joq. Birinshiden, salyqty ádil tóleıtin bıznes bar. Ol erteń «ananikin syzdyń, menikin nege syzbadyń?» deıdi. ıAǵnı, ol memleketke negizgi salyǵyn tólegen bolsa, onda ósimpuldar men aıyppuldar jaıynda sóz bolyp otyr»,- degen edi Elbasy.