Qazaqstanda salyq mádenıeti jyl sanap jaqsaryp keledi – «Ashyq bıýdjet» jobasy
Bul týraly «Ashyq bıýdjet» jobasy aıasynda «ANTIKOR ORTALYǴY» alańynda Nur-Sultan qalalyq memlekettik kirister departamentiniń basshysy Qulmuhambet Isaqov málim etti, dep habarlaıdy QazAqparat tilshisi.
«Jalpy biz memlekettik qyzmettiń 44 túrin kórsetemiz. Qazan aıynyń kórsetkishi boıynsha 1 mln 522 myń adamǵa memlekettik qyzmet kórsetildi. Onyń 98 paıyzy salyqtyq qyzmetterge qatysty. 2 paıyzy kedendik qyzmetterge tıesili», - deıdi Qulmuhambet Isaqov.
Ashyq onlaın dıalog barysynda departament basshysy qazaqstandyqtardyń salyq mádenıeti jyl sanap jaqsaryp kele jatqanyn aıtyp ótti.
«Memlekettik kirister departamentiniń mıssııasy – salyqtyq jáne basqa da mindetti tólemderdiń túsimin ýaqtyly jáne tolyq túsýin qamtamasyz etý, sonymen birge maqsattarǵa jetý úshin memlekettik qyzmetterdi sapaly túrde kórsetý. Jalpy salyq mádenıeti tendentsııasy jalpy jaqsaryp kele jatqanyn atap ótý kerek. Zańbuzýshylyqtar kóbinese qandaı da bir ózgerister týraly ýaqtyly bilmeýdiń saldarynan tirkeledi. Bizdiń salyq tóleýshiler óz mindettemelerin ýaqtyly oryndaýǵa tyrysady», - deıdi Qulmuhambet Isaqov.