Qazaqstanda salaýatty ómir saltyn nasıhattaıtyn joba bastalady

NUR-SULTAN. QazAqparat - QR Aqparat jáne qoǵamdyq damý mınıstrligi janyndaǵy ABQO granty boıynsha júzege asqaly jatqan Fitness Park.KZ áleýmettik jobasy jastardy salaýatty ómir saltyna baýlýǵa baǵyttalǵan, dep habarlaıdy QazAqparat tilshisi.

Vedomstvonyń málimetinshe, granttyq joba jastar arasynda salaýatty ómir saltyn, buqaralyq sportty, dene shynyqtyrý men durys tamaqtanýdy nasıhattaý maqsatynda júzege asa bastady. Fitness Park.KZ baǵdarlamasyn ázirleýshiler, dene shynyqtyrý jáne sport pániniń muǵalimderi, jattyqtyrýshylar men fıtnes nusqaýshylar joba aıasyndaǵy sheberlik saǵattarynyń spıkerleri men qatysýshylary atanady. Buqaralyq jattyǵýlar men sheberlik sabaqtaryna uıymdastyrýshylar 2000-ǵa jýyq jas qazaqstandyqty jumyldyrmaq. Onda «Sport – bul ómir», «Sport árqashan meniń ómirimde», «Tabysty adam – sportpen aınalysatyn adam», «Jattyǵý jáne densaýlyq», «Sport like», «Sport Style» trendter nasıhattalady.

«Salaýatty ómir saltyn barlyq turǵyndar, ásirese óskeleń urpaq ókilderi ustanýy qajet. Bul ásirese, pandemııa kezinde úlken mańyzǵa ıe. Oqýshylar onlaın-oqytý formatyna aýysyp, otyryqshy ómir saltyn júrgize bastady. Sportpen aınalysý úshin abonement alýdyń qajeti joq. Jattyǵýlardy ár aýladaǵy alańdarda da jasaýǵa bolady. Sondaı-aq, durys tamaqtaný da mańyzdy», – deıdi «Serǵalı-Túrkistan» qoǵamdyq birlestiginiń jetekshisi Sholpan Ýsmanova.

Uıymdastyrýshylardyń aıtýynsha, joba aıasynda, sondaı-aq, kásibı jattyqtyrýshylardyń qatysýymen beınerolıkter daıyndalyp, jobanyń áleýmettik paraqshasynda jarııalanbaq.