Qazaqstanda ruqsat etilmegen qoqys úıindileriniń sany qansha

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev zańsyz úıilgen qaldyqtar problemasyn kóterdi, dep habarlaıdy QazAqparat tilshisi.

«Turmystyq qatty qaldyqtar polıgondarynyń jaı-kúıi jáne stıhııalyq úıindiler sanynyń ósýi de ózekti ekologııalyq problema bolyp sanalady. Ǵarysh monıtorıngi 2018 jyly ruqsat etilmegen qoqys úıindileriniń sany 8 600 bolǵanyn kórsetse, 2019 jyly olardyń sany 9 200-ge jetti», - dedi mınıstr Májiliste jańa Ekologııalyq kodeks jobasyn tanystyra otyryp.

Onyń aıtýynsha, qazirgi ýaqytta qaldyqtardy jınaýmen, tasymaldaýmen, qaıta óńdeýmen jáne kádege jaratýmen aınalysatyn kásiporyndar týraly tolyq málimetter joq. Qaldyqtarmen jumys isteý kezinde (ruqsat etilmegen qoqys tastaıtyn jerler, aldyn ala zalalsyzdandyrýsyz qaýipti qaldyqtardy zańsyz kómý) ereje buzý faktileri kezdesýde.

Mysaly, ótken jyldary Mańǵystaý, Aqtóbe, Atyraý, Pavlodar oblystarynda, sondaı-aq Shymkent, Nur-Sultan qalalarynda tıisti túrde óńdelmegen quramynda munaı bar jáne medıtsınalyq qaldyqtar tabyldy.

«Qoldanystaǵy zańnamamen qaldyqtarmen jumys isteıtin kásiporyndardyń qyzmeti reglamenttelmegen. Osyǵan baılanysty jańa Ekologııalyq kodekste qaýipti qaldyqtar jónindegi qyzmetti lıtsenzııalaý men qaldyqtardy jınaý jáne tasymaldaý boıynsha habarlama tártibi kózdelgen. Bul qaldyqtardy jınaýmen, tasymaldaýmen, qaıta óńdeýmen jáne kádege jaratýmen aınalysatyn mamandandyrylǵan kásiporyndardyń tizilimin júrgizýge múmkindik beredi»,- dep atap ótti vedomstvo basshysy.