Qazaqstanda «Rýhanı jańǵyrý» portaly ashylady

ASTANA. QazAqparat - QR Aqparat jáne kommýnıkatsııalar mınıstrligi qoǵamdyq sanany jańǵyrtý baǵdarlamasyn tabysty júzege asyrý maqsatynda jańa «Rýhanı jańǵyrý» portalyn qurady, dep habarlaıdy QazAqparat HAA tilshisi.

Bul týraly búgin Astanada ótken QHA Jýrnalıster klýbynyń keńeıtilgen otyrysynda Aqparat jáne kommýnıkatsııalar mınıstrligi Aqparat komıtetiniń tóraǵasy Nurgúl Maýberlınova málim etti.

«Qoǵamdyq sanany jańǵyrtý baǵdarlamasyn tabysty júzege asyrý aqparattyq-túsindirý jumystarymen tikeleı baılanysty. Jańǵyrtý baǵdarlamasyn tıimdi aqparattyq qoldaýmen qamtamasyz etý maqsatynda mınıstrlik (Aqparat jáne kommýnıkatsııalar mınıstrligi  red.) arnaıy «Rýhanı jańǵyrý» saıtyn qurý josparlap otyr. Bul portal elimizdiń kıeli, mádenı jáne týrıstik oryndarynan tabysty zamandastarynyń tarıhyna deıingi barlyq aqparattar jarııalanatyn biryńǵaı ınternet-resýrsqa aınalady», - dedi Nurgúl Óserbaıqyzy.

Mınıstrlik ókiliniń aıtýynsha, «Rýhanı jańǵyrý» portaly aıasynda baǵdarlamanyń ár baǵytyna jekelegen platformalar jasalady jáne portal arqyly qalyń oqyrman mádenı-bilim berý sıpatyndaǵy túrli málimettermen tanysa alady. Sondaı-aq, saıtta forým, halyqpen keris baılanys fýnktsııalaryn ornatý qarastyrylǵan.