Qazaqstanda rıeltorlardyń qyzmeti týraly zań shyǵarý usynyldy
«Qylmystyq jolmen alynǵan tabystarǵa qarsy is-áreket etý jáne olarǵa taldaý jasaý úshin qarjylyq monıtorıng komıtetine málimetterdi usyný boıynsha rıeltorlardyń mindettemeleri bar. Rıeltorlar sýbektiler bolyp tabylady, ıaǵnı olar tirkelip, zańnamada kórsetilgen jaǵdaılarda málimetterdi usynyp otyrady. Alaıda, qazirgi tańda bul másele aıtarlyqtaı ózekti emes. Sebebi bizde jalpyǵa birdeı deklaratsııalaý týraly norma joq. Bul taqyryp 2020 jyldan keıin ózekti bola túsedi jáne ol jyljymaıtyn múlik naryǵyna yqpalyn tıgizedi dep oılaımyn. Biraq búginniń ózinde kóptegen túıitkildi máseleler qordalanyp qalǵan. Onyń sońy ártúrli saldarǵa alyp keledi», - dedi «dóńgelek ústeldiń» barysynda Qarjy monıtorıngi departamenti basshysynyń orynbasary Muhamedjan Dosqojaev.
Onyń aıtýynsha, lıtsenzııalaýǵa jatatyn qyzmetterdiń 18 túri bar. Lıtsenzııa alýshyny retteýshi tekseredi.
«Degenmen, lıtsenzııadan ótpeıtin tórt qyzmet túri bar. Olar - lombardtar, zergerler, rıeltorlar men jekelegen zańgerlik máseleler jónindegi táýelsiz mamandar. Biz atalmysh sýbektilerdi qadaǵalaýǵa qatysty týyndaıtyn saldar úshin alańdaýlymyz. Bizdiń naryqta «qara rıetorlar», «qara maklerler» degender bar. Olar salyq zańnamasyn oryndaýdan qashady», - dedi M. Dosqojaev.
Onyń aıtýynsha, rıeltorlyq qyzmet naryǵy qatań baqylanýy tıis. Tipti rıeltorlar men olardyń qyzmeti týraly zań shyǵarý qajet.