Qazaqstanda respýblıkalyq mańyzy bar avtojoldardyń 20 paıyzdan astamy nashar - A.Jumaǵalıev

ASTANA. 21 qazan. QazAqparat - Qazaqstanda respýblıkalyq mańyzy bar avtojoldardyń 21 paıyzynyń jaı-kúıi qanaǵattanarlyqsyz. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte Kólik jáne kommýnıkatsııa mınıstri Asqar Jumaǵalıev málim etti.

Mıınstrdiń sózine qaraǵanda, jergilikti joldardaǵy ahýal tipti syn kótermeıdi, nashar kúıdegi mundaı joldar 37 paıyzdy quraıdy. «Jaqsy ári qanaǵattanarlyq jaǵdaıdaǵy joldarǵa qatysty aıtar bolsam, olardyń sáıkesinshe paıyzy birshama joǵary. Respýblıkalyq jeli úshin bul paıyz 79-dy quraıdy ári jergilikti jelide ol birshama tómen. Búgingi tańda jóndeý jumystarynyń qarqyny oń sıpatqa ıe. Biz aǵymdaǵy jyly 5900 shaqyrymdy, onyń ishinde respýblıkalyq jeliniń 3500 shaqyrymyn jóndeý jáne jańǵyrtý jumystarymen qamtı aldyq», - dedi ol.

Sonymen qatar A. Jumaǵalıev kóilk salasyndaǵy birqatar problemaly máselerdiń basyn ashyp berdi. «Bular: zańnamalyq baza men basqarý qurylymynyń jetildirilmeýi, jóndeý jumystarynyń sapasy, avtojoldardyń jaı-kúıiniń qanaǵattanarlyqsyzdyǵy, avtojoldardy jóndeý men ustap turýǵa qarjylandyrýdyń jetkiliksizdigi, úlken júk kólikteriniń shamadan tys júk tasymaldaýy, joldardaǵy qaýipsizdikti qamtý sharalarynyń jetkiliksizdigi jáne servıs jelisiniń joqtyǵy», - degen mınıstr ózi basqaratyn mınıstrlik basqa múddeli memlekettik organdarmen birlesip, atalǵan kemshilikterdi joıý baǵytynda birqatar sharalardy qolǵa alǵandyǵyn basa aıtty.

Esterińizge sala keteıik, 11 qazan kúni ótken Úkimettiń keńeıtilgen otyrysynda Elbasy N.Nazarbaev elimizdiń joldarynyń sapasy nashar ekendigin synaǵan bolatyn. Memleket basshysy atap ótkendeı, jol sapasy jónindegi álemdik reıtıngte Qazaqstan 144 eldiń ishinde 117-shi orynda tur. Kólik jáne kommýnıkatsııa mıınstrliginiń málimetteri boıynsha, Qazaqstandaǵy jalpy paıdalanylatyn joldyń uzyndyǵy 97 myń shaqyrymdy quraıdy.