Qazaqstanda respýblıkalyq avtojoldardyń úshten biri aqyly bolady - J. Qasymbek

ASTANA. QazAqparat - 2020 jylǵa deıin Qazaqstanda respýblıkalyq avtojoldardyń úshten biri aqyly bolady. Búgin Májilistiń Ekonomıkalyq reforma jáne óńirlik damý komıtetiniń keńeıtilgen otyrysynda QR Investıtsııalar jáne damý mınıstriniń birinshi orynbasary Jeńis Qasymbek osylaı málim etti.

Eske sala keteıik, otyrys barysynda «Nurly jol - bolashaqqa bastar jol» jańa ekonomıkalyq saıasatynyń sheńberindegi kólik ınfraqurylymyn damytý máseleleri talqylanǵan bolatyn.

«Kólik ınfraqurylymyn damytýdyń 2022 jylǵa deıingi memlekettik josparyna sáıkes, respýblıkalyq mańyzǵa ıe aqyly avtokólik joldaryn 7 myń shaqyrymǵa deıin arttyrý kózdeledi. Bul shamamen elimizdiń respýblıkalyq mańyzǵa ıe 23 myń shaqyrym joldarynyń úshten birine teń», - dedi mınıstr orynbasary.

Onyń aıtýyna qaraǵanda, aqyly joldardyń qatarynda «Astana-Temirtaý», «Almaty- Qapshaǵaı», «Astana-Pavlodar» jáne basqa da júk qaýyrttylyǵy men qozǵalys trafıkteri joǵary joldar bar. Osyǵan oraı, vedomstvo ókiliniń aıtýynsha, aǵymdaǵy jyldyń birinshi jartysynda kóliktiń barlyq túrleri úshin birinshi tehnıkalyq sanattaǵy avtokólik joldarynyń qaıta engizilgen aqyly júıesi qondyrǵylaryna jobalyq qujattamalar ázirleý jumystary atqarylatyn bolady.

«Budan bólek, mınıstrlik respýblıkalyq jeli boıynsha jol ýchaskelerinen aqy alý júıesin engizý úshin ınvestorlar tartý máselesin qarastyrýda. Sonyń ishinde búgingi kúni ekinshi tehnıkalyq sanattaǵy avtomobıl joldarynan 12 tonnadan asatyn júk kólikteri úshin aqy tóleýdiń ashyq júıesin engigý múmkindikteri de qaralýda», - deıdi J. Qasymbek.