Qazaqstanda raqymshylyq jasaý kezeńi aıaqtaldy

ASTANA. QazAparat -  Memleket basshysy ótken jyldyń 13 jeltoqsanynda qol qoıǵan «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týraly» zań tolyq kólemde júzege asyryldy, dep habarlaıdy QazAqparat QR ІІM Qylmystyq-atqarý júıesi komıtetiniń baspasóz qyzmetine silteme jasap.

Raqymshylyq nátıjesi boıynsha, Qazaqstanda bas bostandyǵyn shekteý oryndarynan 1200 adam bosatyldy jáne 2269 adamnyń jaza merzimi (merzimniń ½, ¼, 1/5-ine) qysqartyldy. Odan bólek, óz jazasyn qoǵamnan oqshaýlaýsyz ótep júrgen jáne turǵylyqty mekenjaıy boıynsha probatsııa esebinde turǵan 6700-den astam adamǵa erkindik berildi.   

Komıtettiń habarlaýynsha, atalǵan zańdy júzege asyrý kezeńinde 40-qa jýyq sheteldik azamat bostandyqqa shyqty. Olardyń basym bóligi - taıaý shetel azamattary. Aıta ketken jón, qazirgi ýaqytta respýblıkanyń QAJ mekemelerinde TMD men alys shet memleketterdiń 1300 azamaty jazalaryn ótep jatyr.

Sondaı-aq, QAJ qyzmetkerleriniń tikeleı aralasýymen abaqtydan bosatylǵandar arasynda júzden astam adamnyń eńbek jáne turmystyq jaıǵasýyna kómek kórsetildi. Zańnama aıasynda barlyq sottalǵandar, sonyń ishinde raqymshylyqqa ilikkender Qazaqstan aýmaǵyndaǵy turǵylyqty mekenjaılaryna jetý úshin jol júrý bıletterimen, maýsymdyq kıimmen jáne azyq-túlik ónimderimen qamtamasyz etiledi.

«Taǵy bir aıta keterligi, densaýlyǵyna baılanysty udaıy kútimdi qajet etetinder jáne kámelet jasqa tolmaǵandar aldyn ala habar berilgen týystarynyń nemese QAJ qyzmetkeriniń alyp júrýimen ǵana bosatylady», - dep tolyqtyrdy QAJ komıtetinen.