Qazaqstanda prokýrorlar men sottardyń kemshilikterin anyqtaıtyn júıe engizilmek

ASTANA. QazAqparat - Búgin QR Joǵarǵy Sotynda «Zańdylyq» aqparattyq-taldamalyq júıesiniń jobasy tanystyryldy. Júıeniń múmkindikterimen qylmystyq isterdi onlaın rejimde tergeýge jol ashylmaq, dep habarlaıdy QazAqparat.

«Endigi kezek qylmystyq is júrgizýdi tolyqtaı aqparattandyrýda tur. Osy maqsatta búgin sot pen prokýratýranyń «Zańdylyq» aqparattyq-taldamalyq júıesiniń jobasyn tanystyryp otyrmyz. Bul júıeni endirýdiń basty maqsaty  qylmystyq protseske «aqyldy» tehnologııalardy engizýdiń kezekti qadamyna arnalǵan»,-dep toqtaldy QR Joǵarǵy Sotynyń tóraǵasy Qaırat Mámı.

Osy oraıda ol jańa elektrondy  qyzmetterdiń arqasynda azamattar sot satylary boıynsha artyq júgiristen qutqarylǵanyn atap ótti. «Ótken jyly «Sot kabıneti» arqyly sottarǵa 756 myńnan astam elektrondy qujat kelip tústi. Bizdiń basty talabymyz - turǵyndar úshin jeńil ári yńǵaıly tetikterdi qurý»,-dedi ol.

«Zańdylyq» jobasynyń maqsaty - Sotqa deıingi tergep-tekserýdiń biryńǵaı tizilimi men sot organdarynyń «Tórelik» aqparattyq-taldamalyq júıesin ıntegratsııalaý esebinen qylmystyq úderistiń sapasy arttyrý. Sonymen qatar bul baǵytta qylmystyq isterdi tergeý men sotta qaraý barysyndaǵy úderiske qatysýshylardyń zań buzýshylyq boıynsha shaǵymdaryn azaıtýǵa negizdelgen.

Óz kezeginde QR Bas prokýrory Jaqyp Asanov  bul joba ortaq jumystyń nátıjesi ekenin aıta kele: «Osydan jarty jyl buryn Joǵarǵy Sotpen tıisti kelisimge keldik. Búgin daıyn júıeni kópshilikke tanystyryp otyrmyz. Bizdińshe, bul júıeniń bereri kóp. Eń aldymen, qylmystyq protsestegi zańdylyqty nyǵaıtady, adamdardyń quqyqtarynyń qorǵalýyn kúsheıtedi»,-dedi.

Sonymen qatar J. Asanov «Zańdylyq» arqyly prokýrorlardyń, sottardyń kemshilikterin der kezinde anyqtaýǵa múmkindik beretinin, sondaı-aq qatelikterdi joıýǵa yqpal etetinin atap ótti. Júıe aıasynda esh paıdasy joq qaǵaz aınalymynan qutylýǵa jaǵdaı jasalmaq.

 

QR Bas prokýratýrasy Quqyqtyq statıstıka jáne arnaıy esepke alý komıteti basshysynyń orynbasary Erǵalı Mabıevtiń sózine qaraǵanda, qylmystyq isti tergeýdiń ortasha merzimi 2-3 aıdy quraıdy. Al júıeni engizgennen keıin qarjylyq jáne ózge de kúrdeli isterden basqalary 2-3 kún tergeletin bolady.

Birqatar uıymdastyrýshylyq rásimder aıaqtalǵan soń, joba 2017 jyldyń shildesinde qoldanysqa engizilmek.