Qazaqstanda prokýrordyń sotqa qatysýy azaıyp keledi

ASTANA. QazAqparat - Qazaqstanda prokýrordyń sotqa qatysýy 7,8 paıyzǵa qysqardy. Bul týraly búgin Úkimet úıinde «100 naqty qadam» Ult josparynyń iske asyrylý barysyna arnalǵan baspasóz máslıhatynda QR Joǵarǵy soty janyndaǵy Sottardyń qyzmetin qamtamasyz etý departamentiniń basshysy Nurserik Sháripov málim etti, dep habarlaıdy QazAqparat.

«100 naqty qadam» Ult josparyna sáıkes, Joǵarǵy sotqa barlyǵy 10 qadamdy iske asyrý júkteldi. Osy 10 qadamnyń barlyǵy 2015-2016 jyldary tabysty iske asyryldy», - degen ol birqatar naqty kórsetkishterge de toqtaldy.

Máselen onyń aıtýynsha, sottardaǵy azamattardyń isterdiń jalpy ótý merzimi 2 esege qysqaryp, olardyń 83,5 paıyzy birinshi sot otyrysynda aıaqtalǵan. Buıryqtyq óndiristegi isterdiń sany 25 paıyzǵa, daýlardy sheshýdiń balama ádisterin qoldaný arqyly aıaqtalǵan ister úshten birge, al medıatsııany paıdalaný arqyly aıaqtalǵan ister 1,6 esege ulǵaıǵan.

«Azamattyq isterdiń 62,5 paıyzy taraptardy sotqa shaqyrmastan-aq jeńildetilgen óndiristik tártippen qaralady. Prokýrorlardyń sotqa qatysýy 7,8 paıyzǵa qysqardy. Qylmystyq sot óndirisinde kelisimge kelý óndirisinde qaralǵan isterdiń sany 43 paıyzǵa, qysqartylǵan tártippen qaralǵan ister 3,5 esege artty. Medıatsııany qoldaný arqyly aıaqtalǵan ister 2,5 esege kóp boldy», - dedi Nurserik Sháripov. Onyń dereginshe, alqa bılerdyń qatysýymen qaralǵan qylmystyq ister sany 28 paıyzǵa kóbeıip otyr. Sonymen qatar elimizde «túrme halqynyń» sany da aıtarlyqtaı qysqarǵan.