Qazaqstanda programmısterdi daıyndaıtyn onlaın-mektep ashylady
«Astana» halyqaralyq qarjy ortalyǵy byltyrdan bastap AHQO bıýrosy negizinde baǵdarlamashy ınjenerler men ázirleýshilerge arnalǵan mamandandyrylǵan baǵdarlamany júzege asyryp otyr. Mundaǵy basty maqsat – halyqaralyq sertıfıkattaý baǵdarlamalary men bilim berý tehnologııalary arqyly bilikti maman daıyndaý.
«QWANT joǵary tehnologııa mektebi Eýropa men AQSh-tyń eń úzdik baǵdarlamalaý mektepteriniń aldyńǵy qatarly tájirıbelerin qamtıtyn Kremnıı alqabynyń tsıfrlyq platformasy – QWASAR arqyly biliktilik arttyrý men suranysqa ıe kásip meńgerýge nıetti barlyq azamatqa múmkindik usynady. QWANT-tyń oqytý ádistemesi tájirıbelik bilim alý, ózara baǵalaý, jobalyq basqarý, geımıfıkatsııa jáne róldik modeldeý prıntsıpterine negizdelgen. Oqý protsesi jumys barysyna barynsha jaqyn orta qalyptastyra otyryp qurylǵan. Al baǵdarlamaǵa qatysýshylar berilgen tapsyrmany jekeleı de, toppen de oryndaı otyryp kún saıyn mashyqtaryn shyńdaı túsedi. Sonymen qatar oqý barysynda baǵdarlamalaý tiline tereńnen boılaı otyryp, árbir qatysýshy avtomatty júıe arqyly óz áriptesterine baǵa berip, úırete alady», - dep habardaıdy AHQO baspasóz qyzmetinen.
QWANT jobasynda oqytýshylar men lektsııa joq. Júıeniń ereksheligi - keń qamtylýy men qashyqtan jumys isteýge múmkindik berýinde. Bul oqý protsesiniń sapasyn saqtaı otyryp barynsha kóp kandıdatqa paıdaly bilim berýge múmkindik beredi. 6 aı boıy QWANT baǵdarlamasy boıynsha sertıfıkat alý úshin irikteýden ótken kandıdattar myna salalarda óz mashyqtaryn damytady: qoldanbaly baǵdarlamalaýdyń ınterfeısi, jasandy ıntellekti tájirıbelik baǵdarlamalaý, veb-ınfraqurylym, mashınalyq oqý, mobıldi qosymsha. Úmitkerlerge talaptar negizgi eki parametrmen qoıylady: baǵdarlamalaý negizderin bilý jáne aptasyna 40 saǵattan artyq ýaqyt boıy belsendi oqýǵa yntasynyń bolýy.
Aı ortasynda bastalatyn birinshi oqý baǵdarlamasyna ótinim qabyldaý 4 sáýirge deıin ashyq.
Aıan Bekenuly
https://qwant.kz/