Qazaqstanda «Probatsııa týraly» zań jobasy 20 maýsymda jasaqtalmaq
Basqosý negizinen Elbasy aıqyndaǵan Ult josparynyń 33-shi qadamynda «Probatsııa týraly» zań jobasyn jasaqtaý jónindegi tapsyrmasyn júzege asyrý máselelerine arnaldy.
Eske salaıyq, Qazaqstanda probatsııa qyzmeti 2012 jylǵy aqpan aıynda «Qazaqstan Respýblıkasynyń keıbir zańnamalyq aktilerine probatsııa qyzmeti máseleleri boıynsha ózgerister men tolyqtyrýlar engizý týraly» zańyna sáıkes engizilgen bolatyn. Al jańa Qylmystyq jáne Qylmystyq-atqarý kodeksterinde sottalǵandardyń bostandyǵyn shekteýge, bas bostandyǵynan aıyrý oryndarynan shartty túrde merziminen buryn bosatylǵandarǵa qatysty probatsııalyq baqylaý belgileý jáne sot olarǵa qatysty ákimshilik qadaǵalaý belgilegen bosatylǵan adamdardyń áleýmettik-quqyqtyq kómek alýyna járdem kórsetý kózdelgen.
Álemdik tájirıbede probatsııanyń tórt (sotqa deıingi, sharttyq-úkimdik, penıtentsıarlyq jáne postpenıtentsıarlyq) satysynyń bar ekendigin atap ótý kerek. Búgingi kúni Qazaqstanda probatsııanyń sharttyq-úkimdik jáne postpenıtentsıarlyq satysy jumys isteıdi. Atalǵan shara barysynda Qazaqstandaǵy probatsııa ınstıtýtyn damytýdyń perspektıvasy talqylanyp, negizinen probatsııanyń barlyq satysy kózdeletin «Probatsııa týraly» derbes zańdy ázirleý máseleler kóterildi.
«Elimizde sotqa deıingi jáne penıtentsıarlyq probatsııany engizý kózdelýde. Sondyqtan «Probatsııa týraly» zań jobasyn jasaý barysynda sotqa deıingi jáne penıtentsıarlyq probatsııanyń basty elementterin jasaqtap shyǵý qajet», - dep atap ótti QR ІІM Qylmystyq-atqarý júıesi komıteti tóraǵasynyń orynbasary Meıram Aıýbaev. - Biz tujyrymdama jobasyn jasadyq. Sondyqtan, qurmetti sarapshylar, atalǵan jobany 1 mamyrǵa deıin zerttep, óz usynystaryńyzdy engizińizder. Biz sonymen qatar 20 maýsymǵa deıin «Probatsııa týraly» zań jobasyn jasaqtap, tujyrymdamamen birge Ádilet mınıstrligine joldaýǵa tıispiz».