Qazaqstanda poıyz bıletin satatyn jańa ınternet-resýrs ashyldy

ASTANA. QazAqparat - Temirjolmen júrý bıletin elektrondy satyp alatyn bilet.railways.kz saıty iske qosyldy, dep habarlaıdy QazAqparat tilshisi «Qazaqstan temir joly» UK» AQ baspasóz qyzmetine silteme jasap.

Jobany «QTJ» UK» AQ fılıaly - «Bas esepteý ortalyǵy» memlekettik «Tsıfrly Qazaqstan» baǵdarlamasy aıasynda júzege asyrýda. Jańa saıtta poıyzdyń júrý bıletin arnaıy kabınet arqyly avtorlandyrýsyz resimdeýge bolady.

«Saıtta «kútý paraqshasy» qyzmeti bar. Tutynýshy ol arqyly bılet bolmaǵan jaǵdaıda, kezekke de tura alady. Bos oryn bolǵan jaǵdaıda tutynýshynyń elektrondy poshtasyna habarlama túsedi. Sondaı-aq, jolaýshylar buryn satyp alynǵan bıletterdi saıt arqyly qaıta ótkize alady. Dıskont karta arqyly «barýǵa» jáne «qaıtýǵa» bıletterdi bir tapsyrys kezinde resimdeýge bolady», - delingen habarlamada.

Odan bólek, saıtta poıyz kestesi týraly anyqtamalyq aqparat, bos oryndar, poıyz bıletiniń baǵasy, jolaýshylarǵa tıimdi jeńildikter týraly málimetter jınaqtalǵan. Tutynýshy jolaýshylardyń baǵalaýyna sáıkes, poıyzdardyń qyzmet kórsetý sapasyna qatysty reıtıngin de kóredi.

«Poıyz bıletin satyp alýǵa halyqaralyq tólemaqy jasaýdyń Visa men MasterCard júıesin qoldana alatyn barlyq ekinshi deńgeıli bankterdiń tólemaqy kartalary qabyldanady. Qıyn másele týyndaǵanda operatordyń online rejimdegi kómegine júginýge bolady», - deıdi «QTJ» UK» AQ fılıaly - «Bas esepteý ortalyǵynyń» dırektory Tileýjen Orazbaev.

Jańa saıt uıaly telefon qurylǵylaryna da beıimdelgen.